Leita barnaræningjans enn

Lögreglan í Kópavogi leitar enn mannsins sem nam níu ára stúlku á brott í Kópavogi síðdegis á miðvikudag. Friðrik Smári Björgvinsson, yfirlögregluþjónn í Kópavogi, segir nokkra menn hafa verið yfirheyrða í gær. Þeim hafi borist fjöldi ábendinga frá fólki en engin þeirra hefur leitt til mannsins sem tók stúlkuna upp í bíl sinn. Leit að manninum verður haldið áfram í dag. Maðurinn ók með stúlkuna upp veginn að Skálafelli og skildi hana þar eftir. Stúlkan veifaði til vegfaranda á Þingvallavegi sem kom henni í réttar hendur.