Vilja að kennarar snúi sáttir

Foreldrar vilja væntanlega að börnin komist sem fyrst í skóla sem skýrir niðurstöðu könnunarinnar, segir Elín Thorarensen, framkvæmdastjóri Heimilis og skóla - landssamtaka foreldra. Um 61 prósent þeirra sem afstöðu tóku í skoðanakönnun Fréttablaðsins taldi að setja ætti lög á verkfall kennara hæfist það á ný. "Við hjá Heimili og skóla höfum tekið þá afstöðu að við erum á móti lögum á verkfall kennara á þeim grundvelli að við teljum að það sé slæmt að fá ósátta kennara inn í skólana. Við gætum þá verið að horfa á fjölda uppsagna í vor. Við viljum að það finnist lausn á málinu þannig að kennarar komi sáttir til starfa og góður vinnufriður verði innan skólanna." Elín segir fólk fyrst og fremst horfa á mikilvægi menntunar barnanna og að þau fái að halda áfram í skólanum og verði ekki aftur send heim. Hún segir foreldra 10. bekkinga áhyggjufyllsta því þeir nemendur þurfi að huga að náminu og ná viðunandi einkunnum til framhaldsnáms.