Óbreytt ástand í kennaradeilunni

Ekkert markvert gerðist á fundi forystumanna samninganefnda kennara, sveitarfélaga og skólastjóra, sem hófst hjá Ríkissáttasemjara klukkan átta í morgun og lauk á tólfta tímanum. Ásmundur Stefánsson ríkissáttasemjari sagði að ekkert nýtt hefði gerst á fundinum en þar hafi verið farið yfir stöðuna. Nú þurfi hóparnir að ákveða hvernig þeir vilji hátta framhaldinu. Enn hefur ekki verið tekin ákvörðun um hvort aðalsamninganefndirnar verði kallaðar til frekari fundarhalda hjá Ríkissáttasemjara í dag.