Ætla að gefa lögreglu skýrslu

Mennirnir þrír, sem frömdu húsbrot á ritstjórn DV í gær, hafa allir heitið því að gefa lögreglunni skýrslu um málið, eftir að lögreglan náði í þá símleiðis í gærkvöldi. Þeir réðust á fréttastjóra DV inni á ritstjórn blaðsins í gær og tóku hann meðal annars kverkataki þannig að á honum sá, og höfðu í hótunum við starfsfólk. Þá ruddu þeir lausamunum af borðum á leiðinni út og gerðu tilraun til að aka á einn starfsmann, sem hljóp út á eftir þeim til að ná niður númerinu af bílnum sem þeir voru á. Eftir því sem fréttastofan kemst næst, viðurkenna mennirnrin allir að hafa verið á vettvangi, en þeir tengjast vélhjólaklúbbnum Fáfni, sem stofnaður var í Grindavík en hefur nú aðstöðu í Kópavogi. Menn tengdir þeim klúbbi tengdust heimsóknum félaga úr Hells Angels hingað til lands á sínum tíma. Framferði þeirra á ritstjórn DV í gær getur heyt undir margskonar misgjörðir í senn svo sem húsbrot, Líkamsmeiðingar, hótanir og eignaspjöll. Lögreglumenn tóku skýrslur af starfsmönnum DV fyrir hádegi til að fá heildarmynd af atburðinum.