Hélt hnífi að hálsi konu

Rétt rúmlega tvítugur maður hefur verið ákærður af Ríkissaksóknara fyrir vopnað rán, ásamt óþekktum samverkamanni, í myndbandaleigu í mars 2002. Málið var þingfest í Héraðsdómi Reykjavíkur í gær. Maðurinn er sagður hafa komið inn í söluturninn Videóspóluna á Holtsgötu og ógnað afgreiðslukonu með hnífi sem hann bar að hálsi hennar. Þá er hann sakaður um að hafa ýtt konunni upp að vegg og niður á gólf þar sem hann hélt henni á meðan samverkamaðurinn stal tæpum sextíu þúsundum króna auk greiðslukortanóta úr peningakassanum.