Heimsmet í áfengissköttum

"Við eigum heimsmetið," segir Andrés Magnússon, framkvæmdastjóri Félags íslenskra stórkaupmanna, um áfengisskatta á Íslandi í samanburði við önnur lönd. Skattar á sterkt vín og léttvín eru hvergi hærri en hér. Aðeins Norðmenn eru fyrir ofan okkur í álagningu á bjór. Þau tíðindi hafa undanfarið borist frá Svíþjóð, Danmörku og Finnlandi að skattar á áfengi fari lækkandi. Fyrir tæpu ári lækkuðu Danir áfengisskatta á sterkt vín um 40%. Um helmingur áfengisinnkaupa var þá farinn úr landi, yfir til Þýskalands, og var lækkunin til að mæta því. Þann 1. mars voru svo skattar lækkaðir verulega í Finnlandi, ekki síst í kjölfarið á inngöngu Eystrasaltsríkjanna í ESB, og nú síðast hafa Svíar tilkynnt að þeir hyggist lækka skatta á sterkt vín um 40%. Ljósin beinast nú að Noregi og Íslandi. Ljóst er að þrýstingurinn er mikill til lækkunar í Noregi, þar sem viðbúið er að Norðmenn leiti í auknum mæli yfir landamærin til áfengisinnkaupa. Staða Íslands, sem eylands, er öðruvísi. Andrés segir þó Félag íslenskra stórkaupmanna "eiga erfitt með að sjá að íslenskir stjórnmálamenn getið staðið mikið lengur frammi fyrir íslenskum neytendum með þá ofurskatta sem hér ríkja".