Ekki frestað til haustsins

Davíð Oddsson forsætisráðherra segir ekki koma til greina að fresta samþykkt nýrra fjölmiðlalaga til haustsins eins og stjórnarandstaðan vill. Í sama streng tekur Halldór Ásgrímsson. Stjórnarandstöðunni býðst að skipa fulltrúa í fjölmiðlanefnd sem tekur til starfa með haustinu. Davíð Oddsson segir ekki koma til greina að fresta samþykkt laganna til haustsins eins og stjórnarandstaðan vill. Aðlögunartími sé langur og það sé nauðsynlegt að hann fari að telja sem fyrst. Stjórnarandstaðan verði svo bara að svara því hvort hún vilji taka þátt í fjölmiðlanefndinni eftir samþykkt laganna. Hann segir að það hafir verið rætt strax í vor að nefndin héldi áfram störfum. Hann sagði það út í bláinn að ríkisstjórnin væri að hafa af fólkinu þjóðaratkvæðagreiðslu með brögðum. Lögunum hefði verið breytt að efni og að gildistöku þannig að menn gætu kosið um lögin í síðasta lagi í alþingiskosningum 2007. Hann sagði það barnaskap að halda að halda að það bryti á bága við þingsköp að setja fram frumvarpið á þinginu. Ákvæðið sem andstaðan ætti við fjallaði um frumvörp sem hefðu verið felld. Halldór Ásgrímsson segir út í hött að frumvarpið sé sami grautur í sömu skál, svo vitnað sé til ummæla formanns Samfylkingarinnar. Þarna séu gerðar veigamiklar breytingar á málinu. Hann vonast eftir sinnaskiptum stjórnarandstöðu en segir ekki koma til greina að fresta gildistöku laganna. Hann segir að þetta sé engin brella heldur vilji stjórnin að ákveðinn rammi liggi fyrir. Það hafi meðal annars verið krafa stjórarandstöðunnar að fella lögin úr gildi, það sé því verið að rétta fram sáttarhönd.