Stóra stærðfræðikeppnin hafin í grunn­skólum landsins

„Stóra stærðfræðikeppnin gengur út á það að búa til spennu fyrir því að læra stærðfræði,“ segir Íris hjá íslenska námsgagnafyrirtækinu Evolytes, sem stendur að keppninni í samstarfi við Andvara farsældarhraðal.

„Við viljum sýna hvað það getur verið gaman að æfa stærðfræði þegar við leggjumst öll á eitt. Þegar börn finna fyrir framförum, keppast um að reikna og upplifa sig fær getum við styrkt jákvætt viðhorf þeirra til stærðfræði og bætt námsárangur þeirra.“ 

„Með keppninni vonumst við til að kveikja áhuga og sjálfstraust nemenda um allt land og veita kennurum námskerfi sem léttir þeim störfin og hjálpar þeim að mæta hverju barni þar sem það stendur.“

Litlir skólar eiga jafna möguleika

Keppnin stendur til 4. desember og fer fram í ævintýraheimi Evolytes. Þar leysa börnin stærðfræðiverkefni til að komast áfram, uppgötva nýja staði og safna svokölluðum Evolýtum. Verkefnin aðlagast getu hvers barns svo allir geti æft sig á sínum forsendum.

Skólarnir keppa um hæsta meðalfjölda svaraðra stærðfræðispurninga á nemanda. Stærð skólans ræður því ekki úrslitum og litlir skólar eiga jafna möguleika á sigri og fjölmennari skólar. Samhliða keppninni vinna allir þátttakendur að sameiginlegu markmiði. Þegar heildarfjöldi svara nær ákveðnum áföngum opnast ný verðlaun og viðbætur í leiknum sem allir njóta.

„Þannig myndast spenna í skólunum,“ segir Íris. „Krakkarnir um allt land eru að safna verðlaunum inni í Evolytes námsleiknum og vinna saman þvert yfir landið.“

Sigurskólinn fær einnig vegleg verðlaun og þar er hugsað til bæði nemenda og kennara.

„Síðast fór skólinn sem vann í bíó með krakkana og kennararnir fóru í spa með búbblum. Okkur fannst mikilvægt að kennarar uppskæru líka.“

Stefna á yfir tvær milljónir réttra svara

Stóra stærðfræðikeppnin fer nú fram í annað sinn. Í fyrra svöruðu þátttakendur yfir 1,7 milljónum stærðfræðispurninga og nú vonast aðstandendur til að komast enn lengra.

„Við erum spennt að ná yfir tveggja milljóna markið í réttum svörum,“ segir Íris.

Almenningur getur fylgst með framvindunni á vef Evolytes. Þar sýnir lifandi teljari heildarfjölda svara og einnig má sjá stöðu skólanna. Þegar skóladagurinn hefst og börnin setjast við stærðfræðina tekur talan að hækka.

Keppnin er hluti af Þjóðarverkefni í stærðfræði sem hófst skólaárið 2025–2026. Með stuðningi Andvara farsældarhraðals bauðst öllum grunnskólum landsins gjaldfrjáls aðgangur að námsefninu fyrir tvo árganga ásamt nemendum í sérkennslu. Nær allir grunnskólar nýttu sér aðganginn fyrsta árið og nemendur svöruðu yfir níu milljónum spurninga á skólaárinu.

Grunnurinn þarf að vera til staðar

Íris hefur lengi brunnið fyrir því að breyta viðhorfi barna til stærðfræði. „Markmiðið mitt í áratug hefur verið að útrýma þessari setningu: Ég er ekki stærðfræðimanneskja,“ segir hún.

Hún bendir á að þegar nemendur missi af ákveðnum grunnatriðum í stærðfræðitímum geti það haft áhrif á framhaldið. Í stærðfræði byggi ný viðfangsefni gjarnan á því sem áður hefur verið lært.

„Yfirleitt, þegar fólk gefst upp á stærðfræði, hefur það einhvers staðar misst úr eða ekki náð tökum á efninu. En það þarf samt að halda áfram með bekknum. Í stærðfræði verðurðu að hafa grunninn til að geta haldið áfram.“

Þarna geti einstaklingsmiðað námsefni skipt máli. Barn sem þurfi meiri æfingu fái verkefni við hæfi en annað geti haldið áfram í flóknari viðfangsefni. Markmiðið sé að fleiri upplifi árangur og öðlist sjálfstraust.

„Allir geta lært stærðfræði á sínum hraða.“

Meiri yfirsýn fyrir kennara

Evolytes er jafnframt verkfæri fyrir kennara sem fá upplýsingar um námsframvindu hvers nemanda. Þannig geta þeir séð hvar þörf er á frekari æfingu og brugðist við.

„Kennarinn fær upplýsingar í rauntíma um hvar allir standa. Kennararnir geta hópað saman þá sem eru í erfiðleikum með sama efnið, gripið fyrr inn í og aðlagað kennsluna miklu betur að nemendunum sem þeir eru með,“ segir Íris.

Hún bendir á að mikil vinna felist í að útbúa einstaklingsmiðað námsefni og fara handvirkt yfir úrlausnir til að greina stöðu hvers barns. „Við viljum gefa kennurum tól sem styður þá í að kenna og leggja inn námsefni hjá krökkunum. Þannig hafi þeir meiri tækifæri til að grípa snemma inn í.“

Í könnun meðal íslenskra kennara á fyrsta ári Þjóðarverkefnisins töldu allir svarendur kennaraviðmótið gagnlegt og 87 prósent sögðu notkunina hafa dregið úr vinnuálagi.

Íslensk hugmynd í fjórum heimsálfum

Upphaf Evolytes má rekja til rannsóknarverkefnis árið 2014 þar sem sálfræði og tölvunarfræði voru sameinaðar til að auka áhuga og námsárangur nemenda í stærðfræði. Í dag er námsefnið á tólf tungumálum og hefur náð til skóla í fjórum heimsálfum.

Íris segir áhuga nemenda vera lykilatriði og gagnvirknin skipti þar miklu. Börnin fái strax viðbrögð við því hvort svörin séu rétt eða röng og ævintýrið hvetji þau áfram.

„Við viljum vekja áhuga þeirra svo þau fái tækifæri til þess að móta nauðsynlega grunnfærni í stærðfræði,“ segir hún.

Í Stóru stærðfræðikeppninni fá þúsundir barna nú tækifæri til þess að æfa sig saman, fagna framförum og uppgötva að stærðfræði getur verið spennandi viðfangsefni.