Birta gott upp­gjör og hnýta í ríkis­stjórnina

Þetta er haft eftir bankastjóranum í Kauphallartilkynningu en þar segir einnig að miðað við áform ríkisstjórnarinnar muni hækkunin vera afturvirk og ná til yfirstandandi árs. 

Ekki vænleg ráðstöfun

„Þetta er að okkar mati skammsýn ráðstöfun til að mæta tímabundnum aðstæðum en ef af verður þá er eðlilegt að hún falli niður eftir 1-2 ár,“ er haft eftir Benedikt Gíslasyni, bankastjóra Arion banka. Mikilvægt sé að huga að samkeppnishæfni Íslands í sambandi við skattinn sem leggst á skuldir fjármálafyrirtækja sem séu að stærstum hluta innlán viðskiptavina.

„Við víkjum okkur auðvitað ekki undan því að greiða skatta til samfélagsins en fyrir eru skattar á íslensk fjármálafyrirtæki vel umfram það sem gerist í löndunum í kringum okkur auk þess sem hér eru í gildi margvíslegar séríslenskar lagakröfur sem hafa kostnað í för með sér,“ er einnig haft eftir bankastjóra í tilkynningunni.

Ef aðeins sé horft til síðasta árs hafi starfsemi Arion banka, að dótturfélögum undanskildum, skilað samfélaginu um 15 milljörðum króna í skatttekjur.

Þjónustutekjur lækka milli ára

Þá er einnig skrifað um að afkoma bankans á þriðja ársfjórðungi sé góð og í samræmi við markmið. Arion banki skilaði hluthöfum sínum 8,7 ma.kr. á fjórðungnum, samanborið við 8,2 ma.kr. á sama ársfjórðungi síðasta árs. Hagnaður á hlut var 6,42 krónur, samanborið við 5,95 krónur fyrir ári.

Hreinar þjónustutekjur bankans lækkuðu hins vegar milli ára, í lok þriðja ársfjórðungs 2026 eru þær 3,8 milljarðar króna en voru 4,0 milljarðar króna í lok þriðja ársfjórðungs 2025.

„Kjarnastarfsemi okkar gengur vel og áfram er góður vöxtur í innlánum en dregið hefur úr vexti útlána sem endurspeglar viðvarandi hátt vaxtastig. Eigin- og lausafjárstaða Arion samstæðunnar er áfram góð og við erum nú sem fyrr í góðri stöðu til að styðja við viðskiptavini okkar í þeim verkefnum sem þeir takast á hendur,“ er haft eftir bankastjóra í tilkynningunni.

Samstaðan mikilvæg

Lán til viðskiptavina lækkuðu um 3 milljónir króna eða 0,2 prósent á fjórðungnum, en innlán frá viðskiptavinum jukust um 33 milljarða króna eða 3,3 prósent, er fram kemur í tilkynningunni. Rekstur Varðar skilaði 0,4 milljóna króna hagnaði, sem er minna en fyrir ári en þá var hagnaðurinn 0,7 milljónir króna. Samsett hlutfall var 85,7 prósent á þriðja ársfjórðungi 2026 samanborið við 88,2 prósent á sama fjórðungi í fyrra.

„Sú samstaða sem náðist fyrr í þessum mánuði meðal stjórnvalda, sveitarfélaga og fjölmargra fyrirtækja í baráttunni gegn verðbólgu var mikilvæg og átti sinn þátt í að uppsagnarákvæði kjarasamninga var ekki virkjað,“ er haft eftir Benedikt. 

Forsendur séu nú til staðar fyrir lækkun verðbólgu og þar með lækkun stýrivaxta.

„Vissulega er margt í ytra umhverfi sem við höfum ekki stjórn á en með víðtækri samstöðu höfum við gert það sem í okkar valdi stendur til að stuðla að lækkun verðbólgu,“ stendur þar ennfremur.