Mætir aftur til að vinna: „Veit núna að ég bý yfir svona geð­veiki“

Ríkarður átti frábært bakgarðshlaup í Heiðmörk um síðastliðna helgi þar sem að hann endaði í 2. sæti og hljóp 38 hringi. Frábær árangur en Ríkarður ætlaði sér sigur, frá því greindi hann í skemmtilegu viðtali á Vísi fyrr á árinu.

Ríkarður gerir upp nýafstaðið bakgarðshlaup í færslu á Strava hreyfiforritinu og er ljóst að hann hefur lært mikið um sjálfan sig á hlaupum í Heiðmörk.

„Aldrei grunaði mig að þetta myndi ganga svona langt en ég er þakklátur fyrir að vita núna að ég bý yfir svona geðveiki og trúið mér, ég mun koma aftur til að láta draum minn, um að verða yngsti sigurvegari í bakgarðshlaupi rætast,“ skrifar Ríkarður meðal annars á Strava.

„Ég er samt nokkuð viss um að ég sé yngsti hlauparinn í heimi til að lenda í öðru sæti í Backyard Ultra en það er ekki nóg fyrir mig, ég ætla alla leið með þetta dót. Ég mun hlaupa annað bakgarðshlaup í maí og ég verð síðasti hlauparinn!“

Á 38 hringjum hljóp Ríkarður rétt tæpa 255 kílómetra en honum leið verst á fyrri stigum bakgarðshlaupsins.

„Mér leið verst á níunda og tíunda hring. Leið virkilega illa en ég hljóp í gegnum vegginn, komst í gegnum nóttina og mér hefur aldrei liðið betur. Ég söng og söng allan tímann í gegnum nóttina. Allan tímann fannst mér eins og ég myndi vinna, ég kom alltaf fyrstur inn á drykkjarstöðina og leit satt best að segja best út allan tímann. Af hverju hætti ég? Af því að ég gat bókstaflega ekki gengið, 260 km er ekkert grín, ég hljóp meira en 6 heil maraþon á 2 dögum, ímyndið ykkur það bara.“

Ríkarður er þakklátur fyrir stuðninginn sem hann fékk.

„Risastórar þakkir til mömmu minnar og systra og allra bestu vina minna og kærustu sem mættu og hvöttu mig áfram allan tímann.“

Þrjátíu og átta hringir Ríkarðs og 39 hringir sigurvegarans Kristjáns Karls Björnssonar, koma þeim í rækilega góða stöðu hvað varðar landsliðssæti í bakgarðshlaupum. Árangur næstu tveggja ára mun skera úr um hvaða hlauparar eru valdir í landsliðið. Eins og staðan er núna eru bæði Ríkarður og Kristján í góðri stöðu á þeim lista.