Jóhanna, Egill og dr. Tingting til Reykja­vík Geothermal

Jóhanna Harpa Árnadóttir, Egill Agnar Októsson og dr. Tingting Zheng hafa öll verið ráðin til fyrirtækisins. Í tilkynningu segir að ráðningarnar séu hluti af áframhaldandi uppbyggingu félagsins á tímum mikils vaxtar og aukinna umsvifa, bæði á Íslandi og erlendis. 

„Jóhanna Harpa hefur áður starfað hjá Icelandair, Landsvirkjun og Norðuráli og hefur jafnframt sinnt sjálfstæðri ráðgjöf og stundakennslu við Háskólann í Reykjavík. Hún er verkfræðingur með meistaragráðu frá Danmarks Tekniske Universitet (DTU). Í starfi sínu hjá Reykjavík Geothermal mun Jóhanna Harpa leiða umhverfis-, samfélags- og gæðamál félagsins og styðja við þróun jarðhitaverkefna með áherslu á sjálfbærni, upplýsingagjöf og samskipti við hagaðila,“ segir í tilkynningu. 

Egill Agnar er ráðinn frá McKinsey & Company í Danmörku þar sem hann starfaði við ráðgjöf. 

„Egill er með meistaragráðu í iðnaðarverkfræði og aðgerðagreiningu frá University of California, Berkeley og BS-gráðu í iðnaðarverkfræði frá Háskóla Íslands. Í starfi sínu hjá Reykjavík Geothermal mun Egill styðja við viðskiptaþróun, fjárhagsgreiningar og mat á fjárfestingarkostum félagsins. Hann mun jafnframt koma að fjármögnun og þróun verkefna á Íslandi og erlendis,“ segir í tilkynningunni. 

Tingting hefur sérþekkingu á vatnajarðfræði og forðafræði, með áherslu á greiningu jarðhitakerfa og mat á jarðhitaauðlindum. Áður en hún gekk til liðs við Reykjavík Geothermal starfaði hún sem forðafræðingur hjá Arctic Green Energy í Reykjavík. Þar kom hún að þróun jarðhitaverkefna og alþjóðlegum ráðgjafarverkefnum. Áður starfaði hún um árabil hjá opinberri jarðfræðistofnun í Kína, þar sem hún vann að rannsóknum á jarðhita og grunnvatni, auk umhverfisrannsókna.

„Tingting hefur jafnframt tekið virkan þátt í alþjóðlegu samstarfi á sviði jarðhita. Hún hlaut styrk til þátttöku í Jarðhitaskóla GRÓ og hefur meðal annars komið að starfsemi kínversk-íslenska jarðhitaskólans og tekið þátt í starfi alþjóðlegra samtaka á sviði jarðhita. Tingting er með doktorspróf í jarðvísindum frá Háskóla Íslands, meistaragráðu í grunnvatnsfræðum og verkfræði og BS-gráðu í vatnafræði og stjórnun vatnsauðlinda frá China University of Geosciences,“ segir í tilkynningunni.

Magnús Dagur Ásbjörnsson forstjóri kveðst spenntur. 

„Þetta ár hefur verið eitt mest spennandi ár félagsins frá upphafi og við stöndum nú á spennandi tímamótum. Síðastliðin 18 ár höfum við komið að þróun jarðhitaverkefna í um 50 löndum um allan heim. Nú er okkar stærsta verkefni hins vegar hér heima og í sumar setti Alþingi virkjanakostinn Bolaöldu í nýtingarflokk rammaáætlunar eftir átta ára þróunarvinnu. Að auki erum við núna að bora í fyrsta verkefni okkar á Kanaríeyjum og vinnum að fleiri verkefnum erlendis. Við erum í miklum vexti og höldum áfram að byggja fyrirtækið upp til framtíðar,“ er haft eftir honum í tilkynningunni.