Jón Dagur skoraði sitt fyrsta deildar­mark fyrir Berlínarbúa

Eftir að hafa verið í frystinum hluta síðasta tímabils og lánaður til Brann hefur Jón Dagur verið í stóru hlutverki hjá Herthu Berlin í upphafi þessa tímabils.

Jón Dagur var í byrjunarliði Herthu Berlin annan leikinn í röð þegar liðið sótti Braunschweig heim í þýsku B-deildinni í kvöld.

Heimamenn skoruðu fyrstu tvö mörk leiksins en Jón Dagur minnkaði muninn í 2-1 mínútu fyrir hálfleik. Þetta var fyrsta deildarmark kantmannsins fyrir Herthu Berlin og annað fyrir félagið í heildina.

Gestirnir frá höfuðborginni jöfnuðu í uppbótartíma fyrri hálfleiks og gerðu svo fyrstu þrjú mörkin í þeim seinni. Braunschweig lagaði stöðuna undir lokin en Hertha Berlin fagnaði 3-5 sigri.

Berlínarbúar hafa unnið alla þrjá leiki sína í þýsku B-deildinni og eru á toppi hennar.

Í úrvalsdeild kvenna vann Köln 1-0 sigur á Hoffenheim á heimavelli. Sandra María Jessen lék síðustu 24 mínúturnar fyrir Köln en Sædís Rún Heiðarsdóttir var ekki í leikmannahópi liðsins.

Þetta var fyrsti sigur Köln á tímabilinu en liðið tapaði fyrsta leik sínum í deildinni fyrir Frankfurt, 2-0.