Sitji ekki á Kjarval að drekka þúsund króna kaffi

Þorbjörg Sigríður Gunnlaugsdóttir dómsmálaráðherra var gestur í nýjasta hlaðvarpsþætti Sölva Tryggvasonar. Hún segir innflytjendamál hafa verið algjört forgangsverkefni þegar hún tók við starfinu. Breytt landslag sé á Alþingi hvað varðar málaflokkinn og bæði þig og þjóð séu sammála um að koma þurfi stjórn á hann og læra af því sem gerst hefur í löndunum í kringum okkur.

„Það er oft hiti í þessum málaflokki sem snýr að innflytjendum, en það er breytt landslag niðri á þingi þegar kemur að þessum málaflokki. Þetta voru mjög miklir pólar og til einföldunar voru þetta annars vegar þeir sem vildu bara lokuð landamæri og hins vegar þeir sem vildu bara allt opið, sama hvað.

En ég held að bæði þing og þjóð séu í dag komin inn á að það þurfi reglur um þetta eins og allt annað. Það þarf einhverja fúnksjón í regluverkinu hér eins og alls staðar annars staðar,“ segir Þorbjörg.

Ísland sé fámenn eyja sem vilji laða fólk til landsins en nauðsynlegt sé að hafa stjórn á málaflokknum.

„Við erum fámenn eyja og við þurfum fólk til landsins atvinnulífsins vegna. Við erum með háskóla hér og súrefni háskóla er alþjóðlegt samstarf. Við viljum laða fólk til landsins. Ég er eindregið þeirrar skoðunar að við eigum sem þjóð að sýna það í verki að við viljum taka á móti fólki á flótta, en við verðum að hafa stjórn á þessum málaflokki eins og öllum öðrum,“ segir Þorbjörg Sigríður.

„Þarna var verið að flytja inn stéttskiptingu“

Skýrasta dæmið um stefnuleysi sé að frá 2017 til 2025 hafi íbúum landsins fjölgað um fimmtíu þúsund manns. Sú fjölgun hafi orsakast af skorti á framtíðarsýn og stéttskipting hafi í kjölfarið verið flutt inn til landsins.

„Þarna var verið að flytja inn stéttskiptingu. Þú ert að flytja inn fólk til að vinna í störfum þar sem laun eru lægri.

Þetta fólk fer ekki á Kjarval eftir vinnu, situr ekki þar með tölvuna að drekka þúsund króna kaffibolla. Það er bara ekki að því. Það er heldur ekki að kaupa sér nautalund í Melabúðinni og er ekki með okkur í gusum.“

Hverfi séu orðin skipt, krakkar séu að koma inn í grunnskólana með afar ólíkar stuðningsþarfir og börn innflytjenda séu síðri til þess að taka þátt í íþróttastarfi. Bæði þurfi að gera kröfur til fólks sem komi til landsins og einnig til Íslands um móttöku fólks.

„Allar þessar ákvarðanir skipta máli og þess vegna er ég að horfa á þetta þannig að það sé einhver stefna, að við horfum til reynslu annarra ríkja og hugsum þetta út frá jafnvægi í samfélaginu. Hvað viljum við? Hvað þolum við? Þá erum við að hugsa um ávinning þess að fá fólk til móts við einhver þyngsli á innviði.

Og síðan það sem mér finnst vanta í samfélagið: Kröfur. Kröfur til fólks sem kemur hingað og kröfur til okkar um móttöku,“ segir dómsmálaráðherra.

Alla þætti hlaðvarps Sölva Tryggvasonar má finna hér.