Ráð­herra byrjar með hlaðvarp

Ráðherra greinir frá þessu í færslu á samfélagsmiðlum. 

„Ég er ungur karlmaður. Svo það hlaut að koma að því að ég byrjaði með hlaðvarp (staðan er eiginlega orðin þannig að maður hefur þungar áhyggjur af ungum karlmönnum ef þeir eru ekki með hlaðvarp). Allavega, hugsunin er þessi: Maður er fundandi allan daginn, alltaf að tala við fólk og læra eitthvað nýtt – og hví ekki að gera það endrum og eins fyrir opnum tjöldum í hlaðvarpi?“ skrifar Jóhann Páll. 

Hann ætli að prófa þetta fram að jólum og taka frá tvær til þrjár klukkustundir á mánuði í þetta verkefni. Hann muni fjalla um samfélagsmál og sérstaklega sín málefnasvið, þá umhverfis-, orku- og loftslagsmál enda umhverfis-, orku- og loftslagsráðherra. 

Fyrsti gestur er Gréta María Garðarsdóttir, stjórnarkona í Já til að sjá og fyrrverandi forstjóri Prís. Hún hefur verið áberandi í umræðunni í kringum þjóðaratkvæðagreiðsluna á laugardaginn næstkomandi. 

Dagur B. Eggertsson, einnig þingmaður Samfylkingar, þó ekki ráðherra, heldur úti hlaðvarpinu Flekaskil ásamt Þórdísi Kolbrúnu Reykfjörð Gylfadóttur, fyrrverandi ráðherra Sjálfstæðisflokksins og tilvonandi sendiherra í London. Þar eru alþjóðamálin oftast í brennidepli. 

Samfylkingin sjálf heldur svo úti hlaðvarpinu Kratinn. Þar er fjallað um hvað er að gerast í flokksstarfinu og rætt við kjörna fulltrúa þess. Þáttarstjórnendur eru allir starfsmenn þingflokksins.