Fyrrverandi ríkasti maður Asíu dæmdur í lífstíðarfangelsi

Samúel Karl Ólason skrifar 20. ágúst 2026 13:50

Hui Ka Yan var á árum áður auðugasti maður Asíu. Hann er 67 ára gamall en var í morgun dæmdur í lífstíðarfangelsi. AP/Dómstóll í Shenzhen, Xinhua

Stofnandi kínverska fjárfestinga- og fasteignafélagsins Evergrande Group hefur verið dæmdur í lífstíðarfangelsi. Hui Ka Yan var um tíma auðugasti maður Asíu en fall Evergrande, sem var einn af hornsteinum kínverska hagkerfisins, hafði umfangsmikil áhrif á Kína og varð að eins konar táknmynd fyrir vandræði á fasteignamarkaði Kína.

Auk hans hlutu 56 aðrir tengdir Evergrande dóma í morgun.

Félagið skuldaði rúmlega 36 billjónir króna (tólf núll), þegar yfirvöld í Kína byrjuðu að taka á ofskuldsetningu á fasteignamarkaði í Kína árið 2020. Lítið fékkst upp í kröfurnar, þó hald hafi verið lagt á allar eigur auðjöfursins fyrrverandi.

Hui, sem er 67 ára gamall og hefur ekki sést opinberlega síðan hann var handtekinn árið 2023, gekkst í apríl við átta ákærum sem snúa að ýmiskonar fjársvikum. Hann var dæmdur í morgun en tvö félög hans voru sektuð um hundruð milljarða. Evergrande Group var sektað um 158 milljarða króna og Evergrande Real Estate Group um 126 milljarða, samkvæmt frétt AP fréttaveitunnar.

Hundruð þúsund sátu eftir með sárt ennið

Evergrande var stofnað árið 1996. Það varð að endingu að stærsta fasteignafélagi Kína en sá markaður var og er gífurlega umfangsmikill. Árið 2023 var fasteignamarkaðurinn um fjórðungur af landsframleiðslu Kína.

Kínverska ríkið hafði lengi keyrt hagvöxt á gífurlegri fasteignauppbyggingu, sem var að miklu leyti fjármögnuð með skuldsetningu.

Félagið safnaði miklum skuldum í gegnum árin en árið 2020 breyttu ráðamenn í Kína reglum um magn peninga sem stór fasteignafélög mættu fá lánaða. Það leiddi til þess að forsvarsmenn Evergrande fóru að selja eignir sínar á miklum afslætti, til að halda fyrirtækinu á floti.

Evergrandi skildi eftir sig hundruð ókláraðra bygginga víðsvegar um Kína og hundruð þúsunda Kínverja sátu eftir með sárt ennið.

Félagið var loks tekið af markaði í fyrra.

Reuters segir að mikil reiði ríki enn meðal þessa fólks. Í hópi þeirra á kínverskum samfélagsmiðli megi til að mynda finna ummæli um að almenningur hafi greitt fyrir fall Evergrande. Hui hafi eingöngu verið dæmdur í fangelsi svo hann yrði ekki myrtur á götu út.

„Hvað með peningana okkar?“ stóð í einni færslu.

Kína Erlend sakamál