Synti yfir Eystrasaltið í 56 tíma án þess að stoppa

Bartłomiej Kubkowski, pólskur sundkappi, var staddur í bænum Kåseberga í Suður-Svíþjóð þegar hann hóf að synda. Áfangastaðurinn var Dziwnów-ströndin í Póllandi en Kubkowski synti 160 kílómetra til að komast þangað.

Það voru tveir bátar sem fylgdu honum á meðan hann var að synda en til að tilraunin yrði gild mátti hann ekki snerta bátana. Frá bátunum fékk hann vatn og mat til að nærast á meðan hann var í sjónum. Það var nauðsynlegt þar sem hann varði 56 klukkustundum í sjónum.

Til þess að vera formlega fyrsti maðurinn til að synda óstuddur yfir Eystrasaltið þurfti hann að synda á ströndina og standa upp án aðstoðar. Það reyndist erfitt fyrir Kubowski enda var hann gjörsamlega örmagna þegar hann náði loks að komast á land og vissi varla sitt rjúkandi ráð en það hafðist að lokum.

Þetta var fimmta tilraunin hans til að synda yfir Eystrasaltið. Síðasta tilraun hans var árið 2025 en þar missti Kubkowski meðvitund ellefu kílómetra frá pólsku ströndinni.

Ástæðan fyrir sundinu var að safna peningum fyrir gott málefni. Hann var að synda fyrir góðgerðarsamtök sem aðstoða börn sem þurfa aðgerð gegn krabbameini og náði hann að safna 140 þúsund evrum eða um 20 milljónum króna.