Raun­veru­leiki sem þú getur ekki forðast

Tíðindin koma eftir afar gott tíma­bil hjá Barcelona sem vann fjór­falt, þar á meðal deildina heima fyrir og svo þann stóra, Evrópu­meistara­titilinn eftir sigur í Meistara­deildinni. Alls töpuðu Börsungar aðeins einum leik á um­ræddu tíma­bili og þó áhugi hafi komið annars staðar frá heillaði það Viktor Gísla mest að halda kyrru fyrir.

„Þetta er í fyrsta skiptið sem ég fram­lengi samning minn við félag,“ segir Viktor Gísli í sam­tali við íþrótta­deild Sýnar. „Það var mark­miðið að vera aðeins lengur á sama stað heldur en ég hef verið að gera undan­farið. Kærastan mín er sátt, ég er sáttur, við unnum Meistara­deildina. Þetta var bara borð­leggjandi að mínu mati.“

Mjög fókuseraður

Í her­búðum Börsunga hefur Viktor Gísli þurft að berjast fyrir mínútum innan vallar gegn besta mark­verði í heimi, Emil Niel­sen sem er nú farinn til Vezprém í Ung­verja­landi. Viktor mun fá harða sam­keppni frá Serg­ey Hernandez, lands­liðs­mark­verði Spánar á komandi tíma­bili og ætlar að gera sig enn meira gildandi.

„Það eru ekki margir sem fá að vera í þessari hringiðu og ég er bara mjög sáttur með að vera þar. Það er alltaf sam­keppni í öllum þessum bestu liðum. Það er bara raun­veru­leikinn í þessum heimi. Maður getur ekki verið að forðast það og ætlast til að ná góðum árangri. Ég er mjög fóku­seraður á mína hluti, reyni að stjórna því sem ég get stjórnað. Hef trú á því að það muni skila mér góðum árangri eins og hefur gerst frá því að ég byrjaði að spila hand­bolta. Það breytist í rauninni ekkert.

Við erum auðvitað að keppa við hvorn annan en maður óskar hinum ekkert ills þannig séð. Maður er bara að reyna vera betri hann á hverjum degi. Svo er þetta liðsíþrótt. Maður vill að liðinu gangi vel og tekur því sem kemur.“

Íslenskum Börsungum fjölgar

Viktor nýtur þess að vera í um­hverfi þar sem krafan er að vinna allt sem í boði er að vinna. Hann er ekki lengur eini ís­lenski leik­maður Barcelona því þangað er liðs­félagi hans úr lands­liðinu, Janus Daði Smára­son einnig mættur.

„Það er heiður að vera partur af þessu í þessi nokkur ár sem maður er at­vinnu­maður. Ég er mjög spenntur. Janus Daði er náttúru­lega að koma. Að vera með Ís­lendingi í liði er eigin­lega ómetan­legt. Það að vera með öðrum Ís­lendingi í Barcelona er örugg­lega enn þá betra. Hann er hér til 2029 líka vera saman í þessu, með smá festu.

Það hjálpar til að vera með liðs­félaga af Norður­löndunum en að vera með Ís­lendingi er allt annað. Að geta talað sitt tungumál á hverjum degi, að þurfa ekki að tala annað tungumál þar sem að þú getur ekki alveg verið þú sjálfur því þú kannt ekki alveg öll orðin sem þú vilt segja.“

„Ævinlega þakklátur henni“

Þá hjálpar einnig að vera með maka sem styður mann í þeim óút­reiknan­lega heimi sem at­vinnu­mennskan getur verið. Jenný, kærasta Viktors Gísla, styður sinn mann og hefur gert til lengri tíma.

„Ég man þegar að ég bar þetta undir hana fyrst. Þegar að við bjuggum á Ís­landi og ég var á leið til GOG í Dan­mörku. Við vorum búin að vera saman í nokkra mánuði og ég lét hana vita að ég væri lík­legast á leiðinni út eftir ár þá tók hún bara mjög vel í það um leið. Hún borgaði meira að segja fyrir öll hús­gögnin okkar þegar að við héldum til Dan­merkur því hún var sú eina sem að átti pening. Ég var bara á ein­hverjum tuttugu þúsund kalli á mánuði í Fram. Hún græjaði það. Ég er ævin­lega þakk­látur fyrir hana að nenna að vera í þessu með mér. Þetta er ógeðs­lega gaman en það koma erfiðir tímar. Sér­stak­lega þegar að maður er að flytja mikið, skipta um lönd, tungumál. Það sem hún gerir mjög vel er að finna sér vini hvar sem er. Hún er mjög góð í þessum félags­legu aðstæðum og bætir upp fyrir það hjá mér.“