Allt að á­tján stigum og létt­skýjað vestan­lands

Þetta segir á vef Veðurstofu Íslands. Á morgun bætist í vind en þá er spáð norðvestan átt, átta til átján metrum á sekúndu og hvassast suðaustantil á landinu. 

Annars verði veður morgundagsins svipað deginum í dag. Hiti breytist lítið og búast megi við súld eða rigningu norðaustan- og austanlands. Víða verði þurrt og bjart en lítilsháttar rigning á Norðvesturlandi annað kvöld.

Veðurhorfur á landinu næstu daga:

Á föstudag og laugardag:

Norðvestan 8-15 m/s, hvassast austantil á landinu. Súld eða rigning norðan- og austanlands, en þurrt á Suður- og Vesturlandi og bjart með köflum. Hiti 8 til 18 stig, hlýjast sunnan- og vestantil.

Á sunnudag:

Norðan- og norðvestan 5-13. Víða léttskýjað sunnan- og vestanlands, en annars skýjað og dálítil rigning austast. Hiti breytist lítið.

Á mánudag (frídagur verslunarmanna):

Norðlæg eða breytileg átt og skýjað með köflum, en bjartviðri sunnan heiða. Hiti 9 til 18 stig, hlýjast á Suðurlandi.