Garnacho vonast til að endur­heimta sjálfs­traust sitt hjá Villa

Kantmaðurinn hefur gengið til liðs við enska úrvalsdeildarfélagið á lánssamningi til að byrja með og Sky Sports News hefur heimildir fyrir því að samningurinn feli í sér skilyrta kaupskyldu.

Garnacho gekk til liðs við Chelsea síðasta sumar frá Manchester United fyrir 40 milljónir punda en átti erfitt uppdráttar á sínu fyrsta tímabili.

Leikmaðurinn hefur nú greint frá því hversu mikilvæg trú Emery á honum var við ákvörðunina um að fara á Villa Park.

„Ég held að ég hafi verið að leita að félagi þar sem ég gæti endurheimt sjálfstraustið og fengið hjálp við að verða aftur sá leikmaður sem ég var fyrir nokkrum árum á mínum fyrstu árum hjá Manchester United,“ sagði Garnacho í sínu fyrsta viðtali við félagið.

„Ég ræddi við stjórann og hann hefur gefið mér það sjálfstraust,“ sagði Garnacho sem spilaði 1268 mínútur í ensku úrvalsdeildinni á síðasta tímabili og var með eitt mark og fjórar stoðsendingar á þeim. Hann kom að marki á 254 mínútna fresti.

„Ég sá þá í Evrópudeildinni á síðasta tímabili og að vera hluti af Meistaradeildinni er mikilvægt og með Unai, ég ræddi við hann áður en ég kom hingað og það er það sem gaf mér sjálfstraustið,“ sagði Garnacho.