Eggert Þór komst í 8-liða úr­slit

All England er elsta badmintonmót heimsins og er haldið á hverju ári. Þetta er eitt af fjórum Super 1000 mótum sem mætti kalla risamótin í badminton. Meðfram mótinu var byrjað að halda All England U19 og tók íslenskur hópur þátt í mótinu.

Eggert Þór Eggertsson náði besta árangri íslensku leikmannanna en hann komst í 8-liða úrslit í einliðaleik karla. Hann mætti sterkum Englendingi í fyrsta leik sem hann vann í oddalotu og svo vann hann næstu tvo leiki þægilega. Í 8-liða úrslitum mætti hann indverskum leikmanni sem var gríðarlega sterkur sem náði að vinna Eggert í annars jöfnum leik.

Eggert spilaði einnig í tvíliðaleik karla með Óðni Magnússyni og unnu þeir fyrsta leikinn örugglega. Þeir mættu svo gríðarsterku ensku pari í 16-liða úrslitum sem þeir náðu ekki að vinna.

Í tvenndarleik spilaði Eggert með Emmu Katrínu Helgadóttur og mættu þau Rúnari Gauta Kristjánssyni og Kötlu Sól Arnarsdóttur frá Íslandi. Leikurinn milli íslensku paranna var gríðarlega jafn en Eggert og Emma Katrín unnu í oddalotu. Í 16-liða úrslitum mættu þau svo tvenndarleiksparinu sem var efst á styrkleikalistanum og náðu Íslendingarnir að standa í hárinu á þeim þrátt fyrir tap.

Iðunn Jakobsdóttir komst í 16-liða úrslit í einliðaleik kvenna eftir að hafa unnið sinn fyrsta leik örugglega. Annar leikur hennar var jafn en Iðunn náði að vinna hann í upphækkun. Í 16-liða úrslitum mætti Iðunn Ástrala sem var númer sex á styrkleikalista mótsins og tapaði Iðunn í hörkuleik.

Nánari upplýsingar um úrslit íslenska hópsins má sjá hér.