Evrópu­þing­menn kalla eftir rann­sókn á Infantino

Folarin Balogun fór í eins leiks bann vegna rauðs spjalds sem hann hlaut í leik Bandaríkjanna við Bosníu í 32-liða úrslitum mótsins. Hann átti því ekki að spila leikinn við Belgíu í 16-liða úrslitum mótsins.

Það breyttist í vikunni og Donald Trump Bandaríkjaforseti greindi stoltur frá því að hafa hringt í Gianni Infantino, forseta FIFA, vegna málsins og fengið hann til að fella bannið úr gildi.

Infantino birti í kjölfarið yfirlýsingu þar sem hann ítrekaði sjálfstæði og hlutleysi dómstóla FIFA. Hann sem forseti hafi ekkert haft með niðurstöðu dómstóla sambandsins að gera.

Balogun spilaði leikinn en Belgía vann þar 4-1 sigur og er komið áfram í 8-liða úrslit.

Evrópuþingmennirnir Barry Andrews, Lara Wolters og Niels Fuglsang greindu frá því í sameiginlegri yfirlýsingu að ákvörðun FIFA um að „breyta reglunni um bönn tengd rauðum spjöldum á miðju móti sé skammarleg og rangfærsla réttlætis.“

„Enn og aftur höfum við séð Infantino og FIFA gangast við kröfum stjórnar Trumps,“ sagði í yfirlýsingunni.

Þingmennirnir hafa beðið knattspyrnusambönd ESB-ríkja að setja pressu á siðanefnd FIFA til að rannsaka Infantino og hvort þrýstingur frá stjórn Trumps hafi átt þátt í afléttingu bannsins. Einnig eigi að rannsaka „önnur möguleg brot á pólitísku hlutleysi“ líkt og að Infantino hafi afhent Trump friðarverðlaun FIFA.

Bréf verði sent til allra knattspyrnusambanda ESB-ríkjanna og 35 kollegar þingmannana þriggja hafi þegar undirritað bréfið.

„Fegurð íþrótta er sí að hún byggist á hlutlægum og gagnsæjum reglum. Þegar Infantino leyfir pólitískum þrýstingi að ákvarða herjir fá að spila, þá hverfur þessi sanngirni út um gluggann,“ segir í yfirlýsingu þingmanna Evrópuþingsins.