Ís­lensku stelpurnar unnu stór­kost­legan sigur á Serbum

Íslensku stelpurnar unnu Serbíu með fjögurra stiga mun, 78-74, í sínum fyrsta leik eftir að hafa unnið fjórða leikhlutann með þrettán stigum, 28-15.

KR-ingurinn Rebekka Rut Steingrímsdóttir skoraði 27 stig í leiknum, Njarðvíkingurinn Hulda María Agnarsdóttir var með 19 stig og fjóra þrista og Stjörnukonan Berglind Katla Hlynsdóttir bætti við 18 stigum.

Íslenska liðið vann með sextán stigum þær mínútur sem Hulda spilaði. Allar þessar þrjár eru að spila stórt hlutverk með liðum sínum í Bónus deild kvenna og Rebekka Rut er A-landsliðskona.

Meðalaldur íslensku leikmannanna er 17,9 ár sem gerir sigurinn enn skemmtilegri. Liðsheildin var til fyrirmyndar í þessum sigri.

Sextán þjóðir hafa áunnið sér rétt til að taka þátt og leika í A-deildinni í fjórum riðlum en stelpurnar okkar eru í C-riðli þar sem þær leika gegn Serbíu, Póllandi og Ítalíu.

Eftir riðlakeppnina verður leikið með útsláttarfyrirkomulagi allra liða. 30 þjóðir taka þátt í U20 EuroBasket stúlkna árið 2026, 16 þjóðir í A-deild og 14 þjóðir í B-deild.