Bíður milli vonar og ótta á meðan fjöl­skyldan er föst undir hótel­rústum

„Í dag er kominn þriðji dagurinn og þau eru enn undir byggingunni. Og þau eru á lífi. Við höfum ekki nægilega margar vélar og réttu tækin til að ná þeim út. Stjórnvöld eru ekki að hjálpa,“ segir Mary Oliveros í samtali við Vísi.

Bróðir hennar Luis Oliveros var á Hotel La Mar Suites í bænum Tucacas í norðvesturhluta Venesúela ásamt eiginkonu sinni Yeluismar López og sex ára dóttir þeirra Fernanda Oliveros þegar jarðskjálfti skall á miðvikudagskvöld. Mary segist vita að þau séu enn á lífi þar sem það hafi heyrst í þeim undir rústunum en engar fregnir hafa borist að undanförnu.

Greint hefur verið frá því að skjálftar að stærð 7,5 og 7,2 hafi skekið Suður-Ameríkuríkið á miðvikudagskvöld. Talið er að tugþúsunda manna sé enn saknað og að 920 hafi farist. Stærri skjálftinn er talinn vera sá öflugasti sem hafi fundist í Venesúela í meira en öld.

Mary segir að íbúar í bænum Tucacas hafi reitt fram hjálparhönd eftir náttúruhamfarirnar en það skorti stuðning stjórnvalda.

„Ég hef fjölskyldu þarna til að hjálpa og vini en það er ekki nóg.“

Þrír þungir dagar

Ekki er búið að koma raforku- og fjarskiptakerfum á svæðinu í samt horf og því hefur verið erfitt fyrir Mary að eiga í samskiptum við foreldra sína og aðra fjölskyldumeðlimi sem eru í Tucacas.

„Þau eru bara að reyna sitt besta til að hringja hingað og láta mig vita hvað er í gangi. En það eru liðnir þrír dagar þar sem ég hef verið að hringja og fengið svo fá svör.“

„Það var svo erfitt að tala við þau. Þau eru að reyna að láta mig vita hvað er í gangi og að þau heyri í þeim undir rústunum. Við höfum ekki teymið og við höfum ekki búnaðinn til að ná þeim út.“

Eftirfarandi myndskeið sýnir hótelrústirnar og viðtal sem tekið var við föður Mary.

Voru næstum komin út þegar jarðskjálftinn varð

„Þetta var fimm hæða bygging. Í dag klukkan 18 í Venesúela [22 að íslenskum tíma] verða liðnar 72 klukkustundir. Og þau eru enn þarna,“ segir Mary gráti næst. Fjölskyldan fór á hótelið til að sækja afmælisveislu á miðvikudagskvöld.

„Þau voru næstum farin þegar þau gleymdu einhverju eða eitthvað gerðist og þá fóru þau aftur inn í hótelbygginguna og þá gerðist þetta. Bara á nokkrum sekúndum.“

Fleiri séu enn undir rústum hótelbyggingarinnar.

„Í upphafi voru um fimmtán manns og aðeins tveir komust út. Svo eru fimm manns sem eru þegar látnir. Fjögurra er saknað, þeirra þriggja, og svo er ein manneskja í viðbót. Við höldum að þau séu öll í sama rýminu.“

Mary segir það mikla áskorun að vera stödd á Íslandi við þessar erfiðu aðstæður. Greint hefur verið frá því að helsti alþjóðaflugvöllur Venesúela hafi skemmst í hamförunum.

„Ég get ekki farið þangað. Ég get ekkert gert. Ég get ekki fært neitt. 

Þau eru enn á lífi. Þau eru enn þarna og við höldum áfram að biðja mikið fyrir þeim.“