„Hefðum við nýtt okkar færi væri ég ekki að fara heim með núll stig“

„Þessi leikur leit þannig út að mér fannst við vera mun sterkari aðilinn í byrjun fyrri hálfleiks. Mér fannst við koma mjög sterkt inn í leikinn og voru betri fyrstu kannski 20-25 mínúturnar, en eftir það hleyptum við þeim aðeins of mikið inn í leikinn,“ sagði Lárus í leikslok.

„Við stigum aðeins of mikið af þeim og þeir náðu að spila einum of mikið inn í millisvæðin, finna leikmenn þar og koma sér í góð svæði. Í seinni hálfleik náðum við að laga það og mér fannst við vera með fína stjórn á þessu og í góðum málum, sem er kannski svolítið asnalegt að segja miðað við þessi mörk sem við fengum á okkur. Ég held að á endanum hafi þessi leikur oltið þeirra megin vegna þess að þeir nýttu færin sem þeir fengu en ekki við. Ég held að ef þú kíkir á xG-tölur þá verði áhugavert að skoða þær. Ég held að þær endurspegli ekki 5-3 leik.“

Þá segist hann hafa viljað sjá sína menn halda sama orkustigi og í byrjun leiks lengur en liðið gerði.

„Að sjálfsögðu. Þetta var okkar plan, að stíga upp á þá, og við vorum með þá alveg fasta uppi og það gekk vel. En það er erfitt að gera það í 90 mínútur. Þegar þeir komu út vorum við bara ekki alveg nógu klókir að pikka upp leikmenn í millisvæðunum og þeir voru að finna sendingarnar allt of auðveldlega. Við löguðum það í hálfleik og í seinni hálfleik þegar þeir voru með boltann og við sátum til baka og ekki í pressu fannst mér þeir langtímum saman ekkert ónáða okkur. Svo koma þessi mörk sem við fáum á okkur sem voru alls ekki nógu góð, en við fengum líka dauðafæri undir lokin og hefðum við nýtt okkar færi væri ég ekki að fara heim með núll stig.“

Lárus segir þó að liðið geti tekið ýmislegt jákvætt úr þessum leik þrátt fyrir tapið.

„Það er hellingur af jákvæðum punktum. Ég var stoltur af mínu liði og stoltur af því að menn gáfu sig hundrað prósent í þetta. Við skoruðum þrjú mörk, en samt, eins og í svo mörgum öðrum leikjum í sumar þá hefðum við átt að skora fleiri.“

Að lokum segist hann ekki ætla að dvelja of lengi við þennan leik og fara að einbeita sér að næsta verkefni þar sem ÍA tekur á móti Fram eftir slétta viku.

„Nú er bara þessi leikur búinn og við förum yfir hann og greinum hann. Svo förum við bara að undirbúa okkur undir Fram og það er allt, allt öðruvísi dæmi,“ sagði Lárus að lokum.