Stuðnings­menn Blika og Víkinga spyrja fyrir hverja leikurinn sé

Áskorun er sett fram undir spurningunni: Fyrir hverja er leikurinn?

Samkvæmt henni var þessi undanúrslitaleikur Breiðabliks og Víkings Reykjavíkur settur á þennan tíma einungis svo RÚV þyrfti ekki að hafa áhyggjur af því að leikurinn skarist á við HM-dagskrá RÚV.

Leiktíminn þykir ekki henta enda er fullt af fólki enn þá statt utanbæjar á þessum tíma dags, bæði stuðningsmenn, starfsmenn og sjálfboðaliðar. „Og það var augljóslega ekki verið að hugsa um neinn af þessum hópum þegar leiktíminn var ákveðinn,“ segir í áskorun stuðningsmannahópa félaganna.

Fyrsta beina útsending RÚV frá heimsmeistaramótinu þennan sama sunnudag er þó ekki fyrr en klukkan 19.00 um kvöldið en það er fyrsti leikur í 32 liða úrslitum keppninnar.

„Við vonum að KSÍ og RÚV sjái sóma sinn í að breyta leiktímanum aftur í 19:15 og passi sig svo í framtíðinni á því að hugsa út í það fyrir hverja fótboltaleikir á Íslandi eru spilaðir,“ segir meðal annars í áskoruninni sem má finna hér fyrir neðan.