„Á endanum snýst þetta um að giftast besta vini sínum“

Erlendur er fæddur árið 1990 og Guðrún Edda 1991 en hjónin hafa verið par í átta ár og eiga saman tvö börn sem slógu algjörlega í gegn í veislunni.

Guðrún Edda ræddi við blaðamann um stóra daginn.

Hvenær og hvernig trúlofuðust þið?

Við trúlofuðum okkur 19. ágúst 2021. Á þrítugsafmælinu mínu, sem var líka skírnardagur þriggja vikna sonar okkar, fór Elli á skeljarnar heima hjá okkur í rólegheitunum. Það var persónulegt, innilegt og alveg fullkomið ef þú spyrð mig.

Hvað voruð þið búin að vera lengi að skipuleggja stóra daginn?

Eitt ár nánast upp á dag!

Hvernig var brúðkaupsdagurinn?

Eitt orð: Geggjaður. Persónulegur með smá stress, hlátur, grátur og gleði allt í bland!

Voruð þið með nokkra daga af fjöri í kringum brúðkaupið?

Já, við gerðum heila helgi úr þessu. Fjörið byrjaði strax á fimmtudeginum með góðu partýi á bar í bænum og á föstudeginum vorum við með ratleik um bæinn sem var virkilega skemmtilegur.

Hann endaði svo á því að allir komu saman á pallinum hjá okkur í drykk og spjall. Það var yndisleg leið til að koma öllum saman áður en stóri dagurinn rann upp og skapa afslappaða og skemmtilega stemningu fyrir helgina.

Voruð þið ákveðin að halda áfangastaðarbrúðkaup?

Já, eftir að við fórum í brúðkaup á Seyðisfirði sumarið 2022 urðum við alveg heilluð af hugmyndinni. Okkur fannst svo sérstakt að vera öll saman á sama stað í nokkra daga, þar sem gestirnir fá tækifæri til að kynnast betur og njóta samverunnar meira en oft gefst á hefðbundnum brúðkaupsdegi. 

Fyrir mig var þetta líka mjög persónulegt, þar sem ég á sterka tengingu við Seyðisfjörð; stjúpmamma mín er þaðan og ég hef alltaf elskað staðinn. Mig langaði ekkert meira en að fá allt mitt besta fólk með mér þangað og deila þessari einstöku upplifun með þeim.

Voruð þið sammála í skipulaginu?

Við vorum alveg sammála um stóru hlutina, þó ég hafi kannski fengið aðeins meira að stjórna skipulaginu. Elli hafði í raun bara eina ósk, að það yrði meira gaman og minna formlegt. Þar vorum við algjörlega sammála og það varð eiginlega leiðarljósið í öllu skipulaginu.

Hvað fannst ykkur mikilvægast?

Það sem skipti okkur mestu máli var að fá allt okkar uppáhalds fólk til að koma alla þessa leið og fagna með okkur. Okkur fannst ótrúlega dýrmætt að svo margir skyldu leggja á sig ferðalagið til Seyðisfjarðar til að deila þessum degi og í raun allri helginni með okkur. 

Það var líka ástæðan fyrir því að við lögðum svona mikla áherslu á að skapa skemmtilega og afslappaða stemningu, þar sem allir gætu notið sín, verið saman og eignast góðar minningar.

Hvaðan sóttuð þið innblástur?

Við vildum alls ekki að þetta yrði sveitabrúðkaup enda með veislusal í miðjum bænum en ekki úti í sveit. Við erum búin að fara i nokkur brúðkaup síðastliðin ár og höfum safnað að okkur hugmyndum úr öllum áttum.

Ég sótti innblástur fyrir skrautið og útlitið víða, meðal annars af Pinterest, TikTok og Instagram. Ég hannaði sjálf allt efnið fyrir brúðkaupið, eins og boðskortin, matseðlana, borðaskipanina og ýmis önnur smáatriði. Það var mjög skemmtilegt ferli að fá að setja minn eigin svip á allt saman. 

Ég var líka einstaklega heppin að hafa mömmu mína og stjúpmömmu með í liðinu, en þær elska báðar að föndra og dúllast. Án þeirra hefði þetta aldrei orðið jafn fallegt og persónulegt.

Hvað stendur upp úr?

Það sem stendur helst upp úr er hvað allt var persónulegt. Fólkið í kringum okkur átti svo stóran þátt í deginum, hvort sem það var í tónlistinni, myndatökunni eða öðrum undirbúningi. 

Það gerði upplifunina enn dýrmætari að vera umkringd fólki sem lagði hjarta sitt í að gera daginn okkar sérstakan. 

Börnin okkar reyndar standa hvað mest upp úr fyrir að hafa tekið óvænt söngatriðið í veislunni.

Sáu einhverjir um veislustjórn og voru skemmtiatriði?

Kristín Ruth og Andri Þór vinir okkar sáu um veislustjórnina og gerðu það með miklum glæsibrag. Kvöldið einkenndist annars af frábærum ræðum og atriðum sem vöktu bæði hlátur og grátur. Kvöldið endaði síðan á plötusnúði sem sá um að spila okkar lög.

Var eitthvað sem kom ykkur á óvart?

Það sem kom okkur mest á óvart voru börnin okkar. Þau höfðu undirbúið myndband þar sem þau sungu lag með Unu Torfa og við héldum að það væri þeirra framlag. Þegar það var búið vildu þau þó alls ekki hætta og enduðu á að taka fleiri lög sjálf upp á sviði.

Hápunkturinn var þegar dóttir okkar tók „Unwritten“ af þvílíkum krafti að salurinn bókstaflega trylltist. Það var algjörlega óvænt, ótrúlega skemmtilegt og ein af þeim stundum sem við munum alltaf eftir.

Hvað voru margir gestir?

Tæplega 120 manns.

Hvernig gekk að velja brúðkaupsfötin og hvaðan sóttirðu innblásturinn fyrir það?

Það gekk í raun frekar vel að velja brúðkaupsfötin, þó ég hafi verið með allt aðra hugmynd þegar ég gekk inn í Loforð. Þar fann ég hins vegar kjól sem ég hefði aldrei trúað að ég myndi velja, en hann reyndist vera sá rétti.

Fyrir Ella var valið aðeins einfaldara. Hann vissi frá byrjun að hann vildi vera í „tuxedo“ og treysti strákunum hjá Suit Up fyrir því að sauma jakkafötin á sig.

Ertu með eitthvað gullið ráð fyrir verðandi hjón sem eru að skipuleggja brúðkaup?

Ekki eyða of mikilli orku í að hafa allt fullkomið. Það verður alltaf eitthvað sem fer ekki alveg samkvæmt áætlun, en gestirnir taka sjaldnast eftir því. Mér fannst persónulega skemmtilegast að vera með puttana í öllu en þannig er ég bara. Ég hefði aldrei getað hugsað mér að láta einhvern annan sjá um þetta allt frá A til Ö.

Tíminn líður ótrúlega hratt og áður en maður veit af er stóri dagurinn liðinn. Njótið allra augnablikanna á leiðinni og munið að á endanum snýst þetta allt um að giftast besta vini sínum.

Ætlið þið í brúðkaupsferð?

Einn daginn já. Við erum ekki komin lengra í skipulagningu, framundan eru bara fótboltamót hjá krökkunum og útilegur í sumar.