Komst á US Open-mótið með son Tiger Woods sem kylfusvein

Russell var einn tveggja sautján ára kylfinga sem tryggðu sér sæti á Opna bandaríska meistaramótinu á mánudag. Það á þó eftir að koma í ljós hvort Russell taki með sér kylfuberann sinn úr 36 holu undankeppninni en þar var á ferðinni sonur þrefalda meistarans Tiger Woods.

US Open fer fram á Shinnecock Hills-golfvellinum í næstu viku og Ísland á fyrsta kylfing til að keppa í karlaflokki.

Russell, sem er tíundi besti áhugakylfingur heims, lifði af skolla á fyrstu holu í umspili og náði fjórða og síðasta sætinu í undankeppninni í Flórída. Charlie Woods er einn af nánum vinum hans, hefur sama umboðsmann og mun fylgja Russell í Florida State-háskólann.

„Þetta gerði andrúmsloftið svo létt. Þetta er í fyrsta skipti sem ég er með vin á pokanum. Mér líkar það mjög vel, að tala ekki mikið um golf, bara hafa gaman,“ sagði Russell.

Russell brosti þegar hann var spurður hvort Woods yrði með honum á Shinnecock Hills og sagði aðeins: „Við sjáum til hvað hann er að gera. Það á eftir að koma í ljós,“ sagði Russell.

Alls kepptu 715 kylfingar á tíu stöðum víðs vegar um Bandaríkin og í Kanada en barist var um 43 laus sæti á 126. Opna bandaríska meistaramótinu.