Löggan þorði ekki að þiggja miða

Þær Arna Eiríksdóttir, Ída Marín Hermannsdóttir og hin 18 ára Thelma Karen Pálmadóttir, sem skoraði sitt fyrsta landsliðsmark á föstudaginn og tryggði 1-0 sigurinn mikilvæga gegn Úkraínu, sáu um að gleðja fólk á förnum vegi með miða á landsleikinn.

Flestir tóku við miðunum fegins hendi og þökkuðu kærlega fyrir sig en strangheiðarlegur lögregluþjónn sem stelpurnar hittu kunni þó ekki við að þiggja miða og kvaðst líklega ekki mega það á meðan hann væri í vinnunni. Sá var þó staðráðinn í að mæta á leikinn.

Miðasalan á leikinn, sem hefst klukkan 19 á morgun, er annars í fullum gangi á vef KSÍ. Til sölu eru miðar í stóru stúkuna og kostar miðinn á svæði 1 7.990 krónur fyrir fullorðna en 3.995 fyrir 16 ára og yngri. Á svæði 2, í endum stúkunnar, kostar miðinn 4.990 krónur fyrir fullorðna en 2.495 krónur fyrir 16 ára og yngri. Hægt er að láta 20% miðaverðs renna til aðildarfélags KSÍ að eigin vali.

Ljóst er að Ísland mætir á morgun sterkasta liði heims og mögulega sterkasta liði sögunnar. Þær spænsku völtuðu yfir Evrópumeistara Englands á föstudaginn, 4-0, og dugar núna sigur gegn Íslandi á morgun til að vinna riðilinn og tryggja sig inn á HM.

Ísland vann Úkraínu 1-0 í Póllandi á föstudaginn og er nú öruggt um 3. sæti riðilsins og þar með áframhaldandi veru í A-deild, auk þess að fara mun auðveldari umspilsleið að HM en Úkraína sem endar í 4. og neðsta sæti.