Löðrandi sveittur Donni þurfti að sætta sig við silfur

Tvö bestu lið Danmerkur mættust í þessu úrslitaeinvígi en Aalborg sýndi og sannaði hvert besta lið landsins væri. Fyrri leikurinn vannst með einu marki, 30-29.

Aalborg vann svo fjögurra marka sigur, 35-31, í seinni leik liðanna í kvöld. Leikurinn var hnífjafn þar til undir lokin þegar Aalborg steig fram úr með fjórum mörkum í röð.

Kristján Örn, Donni, skoraði tvö mörk fyrir Skanderborg og svitnaði eins og svín.

Reyndar svitnuðu allir, leikmenn, þjálfarar og áhorfendur í Djurslands höllinni í Árósum. Loftræstikerfið var eitthvað lélegt. 

Heila tvo klukkutíma tók að klára leikinn. Dómararnir þurftu að stöðva leikinn nánast í hvert einasta skipti sem leikmaður féll í gólfið, samkvæmt Hbold.

Þrátt fyrir það var nokkuð mikið skorað í þessum leik og orkustigið ágætt miðað við aðstæður.