Upp­sagnir hjá Kviku banka

Þetta kemur fram í tilkynningu á Keldunni.

„Í dag áttu sér stað 11 sársaukafullar uppsagnir og jafnframt hefur verið tekin ákvörðun um að ráða ekki í stöður sem hafa losnað og munu losna á næstu mánuðum. Fækkun starfsfólks hefur náð til nánast allra eininga bankans,“ segir í tilkynningu.

Breytt og krefjandi umhverfi kalli á stöðugt aðhald í rekstri, þrátt fyrir umtalsverðan vöxt á flestum sviðum bankans. 

„Gert er ráð fyrir að þessi fækkun stöðugilda muni leiða til kostnaðarlækkunar sem nemur tæplega 400 milljónum króna á ársgrundvelli. Einskiptiskostnaður vegna uppsagna nemur rúmlega 100 milljónum króna, sem gjaldfærðar verða á öðrum fjórðungi ársins.“

Góður fyrsti ársfjórðungur

Í júlí 2025 tilkynntu forsvarsmenn Arion banka og Kviku að bankarnir tveir ætluðu að hefja samrunaviðræður. Ekkert varð af þeirri sameiningu eftir að bankarnir áttu forviðræður við Samkeppniseftirlitið.

„Í ljósi þeirrar afstöðu Samkeppniseftirlitsins sem fram kom á fundinum telja stjórnir Kviku banka og Arion banka að ekki geti orðið af samruna félaganna. Stjórnir bankanna hafa því fallið frá samrunaáformum sem upplýst var um í tilkynningu til kauphallar þann 6. júlí 2025,“ sagði í tilkynningu frá Arion banka.

Fyrsti ársfjórðungur ársins 2026 var mjög góður í rekstri bankans að sögn Ármanns Þorvaldssonar, forstjóra Kviku. Vaxtatekjur hafi aukist, kostnaðaraðhald skilað sér og að áfram væri góður vöxtur í lykilþáttum starfseminnar.