Kaupa Sóma og Þykkva­bæ

Þessu er greint frá í tilkynningu en þar kemur einnig fram að kaupin séu gerð með fyrirvara um samþykki Samkeppniseftirlitsins. Seljendur eru þeir Arnþór Pálsson og Sigurður Ólafsson sem hafa leitt félagið á undanförnum árum. 

Innherji hafði áður greint frá því í lok síðasta mánaðar að framtakssjóður Stefnis væri að vinna í því að ganga frá kaupum á samlokurisanum. 

Arnþór mun láta af störfum við eigendaskiptin en Sigurður mun starfa áfram sem framkvæmdastjóri félagsins. Hann segir fyrirtækið hafa vaxið jafnt og þétt og að það sé fyrst og fremst „okkar frábæra starfsfólki og tryggum viðskiptavinum að þakka“.

Engar áhyggjur af framtíð fyrirtækisins

Þá segist hann spenntur fyrir framhaldinu og hafa fulla trú á því að nýir eigendur geti stutt vel við fyrirtækið.

„Ég tel að nú sé réttur tímapunktur fyrir nýja aðila að taka við eignarhaldi Sóma og leiða félagið í gegnum næsta vaxtarskeið. SÍA V hefur bæði burði og framtíðarsýn til að styðja vel við bakið á Sóma og ég hlakka til að fylgjast með framtíðarvegferð fyrirtækisins“.

Sómi, Júmbó og Þykkvabæjar hafa um áratugaskeið verið meðal stærstu vörumerkja á íslenskum neytendamarkaði. Samstæðan framleiðir fjölbreytt úrval af samlokum, vefjum, salötum og öðrum tilbúnum réttum sem seldir eru í verslunum, bensínstöðvum og á sölustöðum um allt land.

Mikill vöxtur á markaðnum

Í tilkynningu segir að með kaupunum standi til að styrkja enn frekar innviði félaganna, styðja við frekari vöruþróun og mæta vaxandi kröfum neytenda um gæði og ferskleika í takt við breytta lífshætti.

Ólöf Pétursdóttir, sjóðstjóri hjá Stefni, segir fyrir hönd SÍA V að þau séu virkilega hreykin af því að vera að taka við keflinu hjá Sóma og spennt fyrir komandi verkefnum.

„Fyrirtækið á sér einstaka sögu og býr yfir sterkum vörumerkjum sem landsmenn þekkja og treysta. Markaðurinn fyrir tilbúna rétti og fljótlegar, hollar lausnir þegar kemur að mat er í miklum vexti og við sjáum mörg tækifæri til að byggja ofan á þann flotta grunn sem núverandi eigendur hafa skapað,“ segir hún jafnframt og bætir við að þau hlakki til að „vinna með samhentu starfsfólki Sóma og Þykkvabæjar að áframhaldandi framþróun félagsins“.