Nýjustu vendingar, sviðin píla á vett­vangi og kaldar mót­tökur

Sjónarvottur gagnrýnir aðgerðir lögreglu í gær þegar rafvarnarvopni var beitt á mann sem hafði hellt yfir sig bensíni. Hann hlaut brunasár og á  vettvangi í dag mátti finna sviðna pílu úr vopninu. Fjallað verður um málið í kvöldfréttum.

Peningastefnunefnd Seðlabanka Íslands tilkynnir í fyrramálið um stýrivaxtaákvörðun og segir fjármálaráðherra að vaxtahækkun kæmi ekki á óvart. Við heyrum í honum og rýnum í horfurnar fram undan í beinni með aðalhagfræðingi Landsbankans.

Þá förum við til Grænlands með Kristjáni Má Unnarssyni sem segir frá því að sérstakur erindreki Bandaríkjaforseta hafi hlotið kaldar móttökur í heimsókn sinni til landsins. Við verðum einnig í beinni frá sigurhátíð Grindvíkinga eftir Íslandsmeistaratitil í körfubolta auk þess sem við fræðumst um örlög Boeing 757-þotunnar sem Icelandair mun bráðlega leggja.

Í Sportinu förum við betur yfir sigurvímu Grindvíkinga en fráfarandi formaður körfuknattleiksdeildarinnar segir eldsumbrot, rýmingu og mögulega niðurlagningu körfuboltans í bænum aðdraganda alsælunnar sem þar er nú ríkjandi.

Í Íslandi í dag hittum við fólkið á bak við þáttaröðina tuttugu og eitthvað og kryfjum það sem einkennir þrítugsaldurinn til mergjar.

Þetta og margt fleira á samtengdum rásum Sýnar, Vísis og Bylgjunnar klukkan 18:30.