Ingvar á leið í lyfja­með­ferð við ill­kynja krabba­meini

Knattspyrnudeild Víkings tilkynnir um þetta á miðlum félagsins. Ingvar hefur verið utan hóps hjá Víkingi í síðustu tveimur leikjum gegn HK í bikar og Þór Akureyri í deildinni.

„Víkingur mun styðja þétt við bakið á Ingvari og fjölskyldu hans í þessu erfiða verkefni og erum við þess fullviss um að hann hafi sigur að lokum, enda fæddur sigurvegari.”

Ingvar hefur verið aðalmarkmaður Víkings síðustu ár, í gegnum bestu tíma í sögu félagsins. 

Hann kom til Víkings frá danska liðinu Viborg árið 2020, varð Íslandsmeistari árin 2021, 2023 og 2025, auk þess að verða bikarmeistari þrjú ár í röð 2021 til 2023. Að ógleymdum árangri Víkingsliðsins sem náði í umspil Sambandsdeildarinnar árið 2025.

Af mörgun eftirminnilegum stundum Ingvars í Víkingstreyjunni var vítavarsla hans gegn KR árið 2021 líklega sú stærsta. Ingvar varði þar víti frá Kjartani Henry Finnbogasyni, og svo gott sem tryggði Víkingi Íslandsmeistaratitilinn. 

Ingvar á að baki meira en tvö hundruð leiki fyrir Víking og mikilvægi hans í meistaraliðum síðustu ára verður seint ofmetið. Ingvar á einnig að baki átta A-landsleiki fyrir hönd Íslands.

Þá varð Ingvar einnig Íslandsmeistari með liði Stjörnunnar árið 2014 áður en hann söðlaði um í atvinnumennsku til Noregs og Danmerkur. 

Sveitungur hans úr Njarðvík, Aron Snær Friðriksson, hefur staðið vaktina í síðustu tveimur leikjum í fjarveru Ingvars. Með Ugga Jóhann Auðunsson á varamannabekknum.

Fyrr í vetur lagði Pálmi Rafn Arinbjörnsson, varamarkmaður Víkings á síðasta tímabili, skóna á hilluna.

Fréttin hefur verið uppfærð...