Allir far­þegar farnir frá borði og skipinu siglt til Hollands

Alls hafa þrír farþegar skipsins látist, sjö greinst með hantaveiru og þá leikur grunur á að tveir til viðbótar séu einnig smitaðir. Heilbrigðisráðuneyti Spánar greindi frá því í gær að Spánverji sem sætir einangrun í Madríd eftir að hafa yfirgefið skipið væri líklega með veiruna.

Tveir Bretar, sem eru meðal staðfestu tilfellanna sjö, eru á sjúkrahúsi, annar í Hollandi og hinn í Suður-Afríku. Þá er 21 áhafnarmeðlimur Hondius í einangrun í Hollandi.

Oceanwide Expeditions, sem gerir út skipið, greindi frá því í gær að 27 áhafnarmeðlimir og tveir heilbrigðisstarfsmenn væru enn um borð í skipinu. Utanríkisráðuneyti Úkraínu sagði fjóra Úkraínumenn þeirra á meðal og að þeir yrðu áfram um borð til að aðstoða við að sigla skipinu til Hollands.

Sóttvarnayfirvöld segja litlar líkur á umfangsmiklum faraldri í kjölfar útbreiðslunnar um borð.