„Eitt allra eftir­minni­legasta íþrótta­lið síðasta ára­tuginn“

Patrekur Jóhannesson tók við þjálfun Selfoss sumarið 2017 og á fyrsta tímabilinu undir hans stjórn komst liðið í undanúrslit Íslandsmótsins þar sem það tapaði fyrir FH í oddaleik.

Tímabilið á eftir fóru Selfyssingar alla leið í úrslit þar sem þeir mættu Haukum. Selfoss vann fyrsta leikinn en Haukar leik tvö og voru í kjörstöðu til að vinna þriðja leikinn. Þegar skammt var til leiksloka voru Hafnfirðingar með fimm marka forystu, 26-21.

Á þessum árum voru Selfyssingar gjarnir á að koma til baka eftir að hafa lent í ógöngum og það gerðu þeir, einu sinni sem oftar, í leiknum gegn Haukum á Ásvöllum. Miklu munaði um frammistöðu Sölva Ólafssonar sem varði helming þeirra skota sem hann fékk á sig í þriðja leiknum í úrslitaeinvíginu 2019.

„Þetta er eitthvað það óvæntasta sem maður hefur séð. Þegar þú horfir til baka yfir þessi tvö tímabil var markvarslan alltaf lítil sem engin og það var alltaf það sama, ef þeir væru með þennan eða hinn og gætu ruslað upp 37 prósenta markvörslu væru þeir óstöðvandi,“ sagði Tómas Þór Þórðarson í Augnablikunum en hann stýrði Seinni bylgjunni á árunum 2017-19. 

„Þetta var leik eftir leik eftir leik. Meira að segja þegar þeir voru að vinna var talað um að þeir hefðu getað unnið þetta enn stærra og stundum voru þeir í leikjum sem voru spennandi en þurftu ekkert að vera spennandi því markvarslan var ekki.“

Patrekur tók leikhlé í stöðunni 26-21 fyrir Haukum og lagði línurnar fyrir lokasprettinn. Hann bætti aukamanni í sóknina fyrir síðustu mínútur leiksins.

„Sóknarlega vorum við mjög sjaldan í sjö á sex. Mér fannst ég vera með þannig lið að við ættum að geta klárað þetta sex á sex. Það var líka ánægjulegt, að það gekk upp fyrir okkur. Ég man að við vorum búnir að fara ágætlega yfir það ef Haukarnir færu í sjö á sex og þeir gerðu það allavega í framlengingunni,“ sagði Patrekur en Selfyssingum tókst að jafna metin og tryggðu sér svo sigurinn í framlengingu, 30-32. Þeir unnu svo fjórða leikinn á heimavelli og urðu því Íslandsmeistarar.

„Þetta var ógleymanlegt og eitt það alskemmtilegasta sem maður hefur gert á sínum ferli. Það er ekki spurning að þetta er eitt allra eftirminnilegasta íþróttalið, og sigurlið þvert á íþróttir, síðasta áratuginn,“ sagði Tómas.

Brot úr „Enn einni endurkomunni“, þrettánda þætti Augnablikanna, má sjá í spilaranum hér fyrir ofan. Þátturinn verður sýndur á Sýn Sport Ísland klukkan 18:30 í kvöld. Þáttinn má svo nálgast á efnisveitu Sýnar Sport.