„Þarft ekki að vera eins full­kominn og samfélagsmiðlarnir segja þér“

Það er eðlilega mikil eftirvænting fyrir hinu árlega Bakgarðshlaupi sem fer fram í Öskjuhlíðinni um helgina og hefst í fyrramálið. Á meðal keppenda er borðtenniskappinn Magnús Jóhann sem smitaðist af hlaupabakteríunni.

„Ég datt í smá hlaup síðasta sumar, tók Laugaveginn og Bakgarðinn, 100 kílómetra þar, en er með grunn í borðtennis og hef verið að lyfta mikið. Hlaup eru ekki mín sérgrein en ég er orðinn frekar góðir á stuttum tíma,“ segir Magnús í Sportpakkanum á Sýn.

En hvernig komstu inn í hlaupin?

„Aðallega út af forvitni. Mig langaði að sjá hversu langt ég gæti hlaupið og hversu langt ég gæti farið. Núna er ég að sjá hversu langt ég get hlaupið og sjá hvað líkaminn og svefnleysið fer í mann. Þetta er aðallega áskorun og maður hefur gaman af því,“

Magnús kveðst þó óviss hvað hann endist í hlaupunum.

„Ég hef líka geðveikt gaman að borðtennis. Það er líka skemmtilegt og ég veit ekki hvað ég verð lengi í því. Þetta kemur bara í ljós.“

Hleypur fyrir Bergið

Magnús hleypur fyrir og safnar styrkjum fyrir Bergið Headspace, sem stuðlar að geðheilbrigði ungs fólks. Það er málefni sem stendur honum nærri.

„Það kom aðallega útfrá eigin reynslu. Að hafa verið unglingur og krakki, áttavilltur að setja tíma í djamm og einhverja vitleysu. Svo þroskast maður með tímanum og vinnur aðeins í sjálfum sér,“

„Mig langar að sýna krökkum að þú þarft ekki alltaf að vera eins fullkominn og samfélagsmiðlarnir segja þér. Það ströggla alltaf einhverjir einhvern tímann í lífinu, sérstaklega þegar þú ert ungur. Bergið vinnur geggjað starf,“ segir Magnús.

Hvert er markmiðið fyrir hlaupið?

„Eiginlega ætla ég að hlaupa þar til ég get ekki meira. Fyrst og fremst er að ná þessum 160 kílómetrum, það er fyrsta markmið en ég held mjög laust í það.“

Þetta verða bara kósý 24 tímar hjá þér á hlaupum?

„Já, nákvæmlega. Njóta þess, já, ég elska þjáningu, alveg geðveikt,“ segir Magnús og hlær.

Viðtalið má nálgast í spilaranum.