Alvotech lækkar hressi­lega eftir upp­gjör

Samkvæmt uppgjörinu sem birt var í gær námu heildartekjur Alvotech 105,9 milljónum dollara á fyrsta ársfjórðungi, samanborið við 132,8 milljónir dollara á fyrsta fjórðungi liðins árs. Það samsvarar um þrettán milljörðum íslenskra króna. Félagið gerir ráð fyrir að heildartekjur ársins 2026 verði á bilinu 650 til 700 milljónir dollara.

„Við tókum meðvitaða ákvörðun um að eyða meiri tíma í þessar aðgerðir til að draga enn frekar úr þeirri áhættu að úttektir á framleiðsluaðstöðunni hefðu áhrif á reksturinn. Við vildum einnig tryggja að þegar við sendum inn umsóknirnar að nýju til Matvæla- og lyfjaeftirlits Bandaríkjanna (FDA) svari þær fyllilega öllum kröfum eftirlitsins. Endurbæturnar stuðla jafnframt að langtímavexti og verðmætasköpun félagsins,“ var meðal annars haft eftir Lisu Graver, forstjóra Alvotech, í tilkynningu með uppgjörinu.

Fyrir birtingu uppgjörsins stóð gengi hlutabréfa félagsins í 440 krónum en í fyrstu viðskiptum í morgun hefur það lækkað um rúm 10 prósent og stendur í 395 krónum þegar fréttin er skrifuð. Gengið hefur lægst farið í 389 krónur en það gerðist í mars síðastliðnum.