Sjö felldir í Úkraínu

Viðbragðsaðilar og bæjaryfirvöld hafa greint frá þessu en Volodimír Selenskí Úkraínuforseti sagði í samfélagsmiðlafærslu að árásirnar hefðu staðið yfir alla nóttina, aðfaranótt laugardags. Héraðsstjórinn í Kherson hefur enn fremur gefið út að sjö hafi særst í rússneskum árásum þar, að því er BBC greinir frá.

Lengra til austurs gerðu Rússar allt að 700 loftárásir á hátt í fimmtíu byggðakjarna í Saporísjíahéraði yfir 24 tímabil. Þar féllu tveir að sögn héraðsstjórans Ivans Fedorov, sem sagði að heimili, farartæki og innviðir hefðu orðið fyrir tjóni.

Þá urðu samgönguinnviðir fyrir tjóni í Ódesa-héraði, samkvæmt yfirlýsingu varaforsætisráðherrans Oleksí Kúleba í gær. „Árásin olli skemmdum á innviðum hafnar og flutninga, vöruhúsum, tæknibúnaði, geymslutönkum fyrir farm, stjórnsýslubyggingum og vöruflutningum,“ skrifaði Kúleba á Telegram og bætti við að farþegaskip sem sigldi undir flaggi Palá hafi einnig orðið fyrir skaða. Ekki var tilkynnt um meiðsl á áhöfn.

Úkraínski flugherinn sagðist hafa skotið niður eða gert óvirka 124 af 144 drónum sem Rússar sendu á loft í nótt en árásir voru skráðar á 11 stöðum.

Sömuleiðis sögðust Rússar hafa skotið niður um 200 úkraínska dróna. Í Jekaterinburg í Rússlandi, sem er um 1.600 kílómetrum frá landamærum Úkraínu, hafi fimm manns særst þegar dróni hafnaði á byggingu, að sögn yfirvalda í Rússlandi að því er BBC greinir frá.