Upp úr sauð milli þjálfaranna í Garða­bæ: „Ég bað hann af­sökunar“

Það var Hilmar Smári Henningsson sem tryggði Stjörnunni sigur með flautukörfu í framlengingunni og kom með því Stjörnunni 2-0 yfir í einvíginu. Garðbæingar geta klárað einvígið í Síkinu í næsta leik.

Upp úr sauð milli þjálfaranna eftir leik og var Arnar Guðjónsson þjálfari Tindastóls verulega ósáttur með að karfa Hilmars Smára skildi fá að standa. Vildi hann meina að Hilmar hafi skrefað í aðdragandanum.

„Algjörlega mitt klúður“

Arnar og Baldur Þór, þjálfari Stjörnunnar, áttu í orðaskiptum og ýtingum fljótlega eftir leik og hefur Baldur beðið Arnar afsökunar á því hvernig hlutirnir þróuðust þeirra á milli. 

„Þetta voru mistök hjá mér,“ sagði Baldur í viðtali við Andra Má Eggertsson á Sýn eftir leik. „Mér fannst hann einhvern veginn ekki þakka fyrir leikinn. Hann er í erfiðum aðstæðum þarna. Er að skoða skjáinn. Það er siður að þjálfarar takist í hendur eftir leik. En þetta var klúður hjá mér. Ég átti að gefa honum meira rými. Bara klúður hjá mér. Við töluðum um þetta. Bara klúður hjá mér. Algjörlega mitt klúður. Ég bað hann afsökunar á vellinum og bið hann aftur afsökunar núna. Ég hefði átt að gera þetta betur.“

„Skref“

Arnar fór einnig yfir málin með Andra Má í viðtali eftir leik og virðist sem svo að hann og Baldur hafi náð að ræða málin aðeins sín á milli. Arnar er ósáttur með sigurkörfu Hilmars Smára, telur að um skref sé að ræða.

„Skref. Þetta er eins og íþróttir eru. Við erum búnir að vera óheppnir á stórum stundum í vetur með dóma,“ sagði Arnar í viðtali við Andra Má eftir leik. „Hilmar skrefar í þessu skoti á stepbackinu.“

„Ég er ekki að saka neinn um eitt eða neitt. Þeir (dómararnir) eru ekki í auðveldri stöðu. Ég efast ekki um að þeir séu að gera allt eins vel og þeir geta. Þetta hefur bara lent svona. Það er svekkjandi að þetta hafi gerst.“