Stjörnurnar mættu með gufu­potta til að hita takka­skóna

Fjallað er um upprisu norska liðsins, eftir að hafa ekki komist á stórmót frá því árið 2000, í bókinni Oppstandelsen eftir Alfred Fidjestøl.

Þar er meðal annars fjallað um það að stærstu stjörnur landsliðsins, Erling Haaland og Martin Ödegaard, hafi fengið í gegn að sérstök hitunartæki fyrir takkaskó yrðu tekin í notkun. Tæki sem þeir væru vanir hjá sínum félagsliðum.

Vilja skóna eins mjúka og hægt er

„Á meðan leikmennirnir gerðu undirbúningsæfingar var öllum fótboltaskónum safnað saman og þeir settir í tvo stóra gufupotta sem starfsliðið hafði sjálft flutt með sér frá Ullevaal. Í þeim voru skórnir látnir liggja í 75 gráðu heitri vatnsgufu,“ segir í bókinni.

Tilgangurinn með þessu er að gera skóna eins mjúka og hægt er, svo að þeir leggist eins og sokkur að fótum leikmanna þegar þeir klæða sig í þá.

Ståle Solbakken, landsliðsþjálfari Noregs, segir í samtali við TV 2 að hann hafi aldrei áður verið búinn að heyra um þessar aðferðir en er ánægður með þær.

„Þetta hljómar ekki eins og dýrasta bragðið í bókinni svo það er líklega skynsamlegt. Það lítur út fyrir að það virki, svo það er eitthvað sem við verðum að taka með okkur,“ sagði þjálfarinn.