Ágúst Ís­lands­meistari í fyrsta sinn og Thelma fagnaði fimmta titlinum

Í karlaflokki tryggði Ágúst Ingi sinn fyrsta Íslandsmeistaratitil með frábærri frammistöðu á öllum áhöldum og sýndi í gær að hann er orðinn einn fremsti fimleikamaður landsins.

Gærdagurinn tók hins vegar óvænta stefnu þegar Dagur Kári Ólafsson, sem talinn var líklegur til sigurs, slasaði sig á tvíslá. Þrátt fyrir að reyna að halda áfram og aðlaga æfingar sínar á svifrá var ljóst að hann náði sér ekki á strik og ákvað að hætta keppni.

Valgarð Reinhardsson, margfaldur Íslandsmeistari í fjölþraut, tók ekki þátt í fjölþrautinni að þessu sinni, en verður þó á meðal keppenda í úrslitum á áhöldum í dag þar sem hann keppir á hringjum.

Mikla athygli vakti einnig endurkoma Martins Bjarna Guðmundssonar, sem sneri aftur til keppni eftir langvarandi meiðsli og hafnaði í 2. sæti. Atli Snær Valgeirsson, Íslandsmeistari síðasta árs, endaði í 3. sæti eftir jafna og harða keppni.

Í kvennaflokki stóð Thelma Aðalsteinsdóttir uppi sem Íslandsmeistari eftir glæsilega og örugga keppni.

Með sigrinum jafnar hún Berglindi Pétursdóttur og Sif Pálsdóttur yfir fjölda Íslandsmeistaratitla í fjölþraut. Titlarnir eru nú orðnir fimm talsins hjá Thelmu og hún styrkir enn stöðu sína meðal fremstu fimleikakvenna landsins.

Einungis ein kona hefur unnið Íslandmeistaratitil oftar en þær þrjár og það er hún Thelma Rut Hermannsdóttir, sex sinnum. Thelma Aðalsteinsdóttir gæti því jafnað met nöfnu sinnar á næsta ári.

Lilja Katrín Gunnarsdóttir veitti Thelmu harða keppni og hafnaði í 2. sæti, aðeins 1,134 stigum á eftir henni. Kristjana Ósk Ólafsdóttir tryggði sér 3. sætið, en baráttan um verðlaunasætin var afar jöfn.

Sérstaklega vakti athygli hörð barátta um bronsið þar sem fyrrum Íslandsmeistararnir Agnes Suto (2019) og Nanna Guðmundsdóttir (2021) áttust við.

Agnes endaði að lokum í 4. sæti, aðeins 0,177 stigum frá verðlaunasæti, og hefur vakið athygli fyrir sterka endurkomu þar sem hún keppir bæði í áhaldafimleikum og hópfimleikum. Hún sýnir enn og aftur að hún tilheyrir fremstu röð þrátt fyrir að vera 34 ára og æfir ekki alltaf af fullum krafti.

Nanna var einnig í harðri baráttu um verðlaunasæti en varð fyrir því óláni að slasast í gólfæfingum, á síðasta áhaldi sínu, og gat því ekki lokið keppni.

Úrslit á einstökum áhöldum fara fram í dag og má búast við áframhaldandi spennu þar sem keppendur berjast um Íslandsmeistaratitla á hverju áhaldi. Nánar má lesa um mótið á heimasíðu Fimleikasambands Íslands.