Sindramenn og Blikar byrja vel

Sindri og Breiðablik voru bæði á heimavelli og komust í 1-0.

Sindramenn unnu 23 stiga sigur á Selfossi á Hornafirði en þeir voru komnir í 31-20 eftir fyrsta leikhlutann. Þeir gengu síðan frá leiknum með því að vinna þriðja leikhlutann 27-18.

Birgir Leó Halldórsson var frábær hjá Sindra í kvöld og skoraði 26 stig en Gísli Þórarinn Hallsson var með 23 stig. Birgir Leó setti niður sex þriggja stiga skot og Gísli nýtti þrjú af fimm skotum sínum fyrir utan þriggja stiga línuna.

Steven William Lyles skoraði mest fyrir Selfoss eða 25 stig en Collin Anthony Pryor var með 19 stig.

Breiðablik vann 96-87 sigur á KV í Smáranum þar sem strákarnir úr Vesturbænum settu mikla spennu í leikinn með því að vinna þriðja leikhlutann 30-19. Það munaði aðeins þremur stigum fyrir lokaleikhlutann, 71-68, en Blikarnir rifu sig í gang og lönduðu sigri í fjórða leikhlutanum.

Sardar Calhoun skoraði 25 stig fyrir Blika, Vojtéch Novák var með 18 stig og Veigar Elí Grétarsson skoraði 16 stig. Það voru margir að skila því Logi Guðmundsson skoraði fimmtán stig og Sölvi Ólason var með þrettán stig.

Lars Erik Bragason skoraði 23 stig fyrir KV og Arnór Hermannsson var með 17 stig.