Hilmar Smári: Mjög stoltur af mínum mönnum

Hilmar var spurður að því hvað breyttist hjá Stjörnunni í seinni hálfleik eftir jafnan fyrri hálfleik.

„Mér fannst við bara koma sterkari út og við framkvæmdum varnarleikinn okkar betur í seinni hálfleik. Í lok fyrri hálfleiks þá fannst mér við ná betra flæði í sóknarleiknum sem mér fannst við halda út í seinni hálfleik. Mér fannst við taka réttar ákvarðanir og pössuðum boltann vel. Það skipti mestu máli.“

Hilmar var ekki sammála blaðamanni þegar hann var spurður að því hvort það hafi komið honum á óvart hvernig KR-ingarnir koðnuðu niður í seinni hálfleik.

„Koðnuðu en ekki koðnuðu. Ég mest af öllum get talað um það að eiga lélega skotleiki og klikka á skotum sem maður er vanur að hitta. Ég er ekki sammála því að þeir hafi koðnað niður. Þeir eru það gott lið að ég er bara ósammála því að þeir hafi koðnað niður. Við gerðum bara það vel og gáfumst aldrei upp. Það er rosalega erfitt að halda forskoti í úrslitakeppninni og mér fannst við ná því og ég er bara mjög stoltur af mínum mönnum að ná því.“

Hver er munurinn á milli leiks tvö og leiks þrjú að mati Hilmars?

„Mér fannst við bara koma sterkir inn í seinni hálfleik. Við vorum svolítið flatir í fyrri hálfleik. Munurinn var svo ákefðin og að við fórum að finna svæði í þeirra vörn sem við náðum að sækja á. Við vorum að taka betri ákvarðanir og sækja betur á þessar opnanir og gerðum það reglulega.“

Hvað hugsa menn um á milli leikja þegar það er möguleiki á að komast áfram í næstu umferð?

„Það er alltaf sama saga. Bara einn leikur í einu og ef maður fer of langt með þetta þá fer hausinn bara í bull. Eina sem við hugsum um er að við hugsum vel um líkamann okkar og vera tilbúnir í næsta leik. Það er erfitt að ná í sigur á útivelli í úrslitakeppninni og sérstaklega á Meistaravöllum. Það er bara okkar markmið núna.“