Goð­sagnir lögðu Tiger línurnar: „Hann á ekki að keyra“

Mastersmótið, fyrsta risamót ársins í golf­heiminum, hófst á Augusta National vellinum í Georgíu í gær. Þar er ekki að finna fimm­falda Masters meistarann Tiger Woods sem er í með­ferð í kjölfar hand­töku fyrir akstur undir áhrifum í Flórída undir lok síðasta mánaðar.

Hinn fimm­tugi Woods neitaði sök í ákæru um ölvunar­akstur með eigna­tjóni og fyrir að neita að gangast undir lög­legt próf.

Gary Player, þre­faldur sigur­vegari á Mastersmótinu, finnur til með Tiger sem hefur mátt þola miklar raunir undan­farin ár. Fjögur bíl­slys, ótal að­gerðir og meiðsla­saga hefur sett strik í reikninginn á seinni helmingi þessa sigursæla kylfings.

Player tekur það fram að hann hefur samúð með Tiger og sárs­aukanum sem hann finnur dags dag­lega sökum meiðsla- og slysasögu sinnar. Hann eigi hins vegar ekki að að keyra bíl.

„Ég held hann sé búinn að fara í ein­hverjar tuttugu að­gerðir á baki og fótum, margar að­gerðir og finnur fyrir sárs­auka,“ sagði Player í viðtali á Mastersmótinu. „Lít ég niður á hann fyrir að taka lyf til þess að sofa betur? Alls ekki. En ég tel að hann ætti ekki að keyra bíl. Þegar að þú ert undir áhrifum svona lyfja er hættu­legt að keyra. Sömu­leiðis er það hættu­legt að vera í símanum á meðan að þú ert að keyra.“

Tiger eigi að fá sér einka­bíl­stjóra.

„Viðbrögð mín eru álíka góð og þegar að ég var tvítugur,“ sagði hinn níutíu ára gamli Player. „En ég keyri ekki lengur. Ég er með einka­bíl­stjóra.“

Sir Jack Nick­laus, sem er ásamt Sir Nick Faldo og Tiger Woods einn þeirra þriggja kylfinga sem hefur varið titil sinn á Mastersmótinu, tók í svipaðan streng og Player.

„Gerðu það sem þú þarft að gera til þess að koma til baka. Golfíþróttin þarf hann, við myndum elska það að fá hann aftur.“

Bein út­sending frá öðrum keppnis­degi Mastersmótsins í golfi hefst klukkan fimm á Sýn Sport í dag. Rory McIl­roy, ríkjandi Masters meistari er í for­ystunni eftir fyrsta keppnis­daginn en deilir fyrsta sætinu með Sam Burns. Báðir eru þeir á fimm höggum undir pari eftir fyrsta keppnis­dag.