„Fólk má velta sér upp úr hlutunum og við leyfum þeim að gera það“

„Þetta var mjög góður leikur á milli tveggja góðra liða. Það voru mikil gæði í þessum leik og bæði lið að skjóta vel,“ sagði Hörður Axel Vilhjálmsson, þjálfari Keflavíkur, eftir frábæran sigur liðsins í kvöld.

Mikil umræða skapaðist eftir tap liðsins í fyrsta leiknum í einvíginu vegna fjarveru Harðar Axels sem var á Tenerife í aðdraganda leiksins.

„Þetta er ferð sem var löngu plönuð og það vissu allir af henni fyrir löngu síðan innan liðsins og í kringum liðið. Undirbúningur okkar fyrir seinasta leik var eins og venjulega þó svo að ég hafi kannski ekki verið á staðnum að þá var ég mikið á Teams.“

Hörður sagði að umræðan hafi ekki haft áhrif á liðið enda allir fókuseraðir á verkefnið fyrir höndum.

„Fólk má velta sér upp úr hlutunum og við leyfum þeim að gera það en á sama tíma þá erum við einbeitt á okkar verkefni og sýnum því mikla virðingu.“

Hann sagði jafnframt að hann hafi átt von á umræðu þar sem aðstæður væru sérstakar.

„Ég vissi að það kæmi umræða um þetta enda er þetta kannski frekar sérstakt. Seinasta sumar var ég ákveðinn í að taka mér frí frá körfubolta og var búinn að panta þessa ferð. En svo kemur þetta verkefni upp og þetta eru stelpur sem að mér þykir mjög vænt um og mér langaði að þjálfa. Þá breytti ég þessari löngu ferð í smá pit stopp á Tene.“

Það virðist því sem sú umfjöllun sem fór af stað hafi haft lítil sem engin áhrif á Keflavíkurliðið sem sigraði frábærlega í kvöld.