Ó­sáttur við um­ræðuna og gagn­rýnir keppniauta Mercedes

Mercedes hefur farið afar vel af stað á tímabilinu til þessa og unnið báðar keppnirnar fyrir þriðju keppnishelgi tímabilsins í Japan um komandi helgi. George Russell leiðir stigakeppni ökuþóra en það var liðsfélagi hans Kimi Antonelli sem bar sigur úr býtum í kínverska kappakstrinum í síðustu umferð. 

Það dylst engum að Mercedes er með hraðasta bílinn í upphafi tímabils en mikil umræða hefur skapast eftir síðustu keppni varðandi lögmæti framvængsins á bíl Mercedes. 

Kveðið er á um það í nýju regluverki Formúlu 1 sem tekið var í notkun fyrir yfirstandandi tímabil að bæði aftur- og framvængur bílanna megi opnast á ákveðnum stöðum í hverri braut fyrir sig. Utan þeirra kafla verði þeir að verða lokaðir.

Eftir kínverska kappaksturinn vakti athygli myndband af Mercedes bíl Kimi Antonelli í brautinni þar sem sjá mátti opnun á framvængnum á stað þar sem hann á að vera lokaður. Er það mat liðsmanna annarra liða að þar hafi Kimi grætt góðan tíma.

Þetta er ekki í fyrsta sinn sem efast er um lögmæti Mercedes bílsins en fyrir tímabilið var mikið rætt um vélarbúnað liðsins. 

George Russell hefur fengið sig fullsaddann af kvörtunum annarra liða. Það hafi ekki verið vísvitandi hjá Mercedes að vængurinn á bil Kimi hafi verið opinn, heldur sé um að ræða vandamál sem verið sé að vinna í að leysa. 

„Bara vegna þess að við erum komnir aftur í fremstu röð finnst mér það ekki réttlátt af hinum liðunum að reyna hægja á okkur með öllum tilteknum ráðum. Sér í lagi þegar aðeins tvær keppnishelgar eru liðnar af tímabilinu,“ sagði Russell í samtali við Sky Sports. 

Sýnt verður beint frá allri keppnishelgi Formúlu 1 í Japan um komandi helgi á Sýn Sport Viaplay.