Út­tekt á lofts­lags­stjórnsýslu frestast fram á haust

Upphaflega ætlaði Ríkisendurskoðun að ljúka stjórnsýsluúttektinni í vor. Í skriflegu svari við fyrirspurn Vísis segir stofnunin að úttektin sé í vinnslu en að hún hafi tekið lengri tíma en áætlað var. Nú sé stefnt að því að ljúka henni í haust.

Stofnunin sendi umhverfis-, orku- og loftslagsráðuneytinu bréf í nóvember þar sem því var tilkynnt um úttektina. Þá hafði ríkisstjórnin nýlega leiðrétt svonefnt landsákvarðað framlag um samdrátt í losun gróðurhúsalofttegunda til Parísarsamningsins. 

Leiðréttingin var gerð eftir að í ljós kom að stjórnvöld höfðu misskilið eðli samstarfs þeirra við Evrópusambandið í loftslagsmálum um árabil og skilað inn markmiði Evrópusambandsins í stað þess að senda inn sjálfstætt losunarmarkmið.

Væntur árangur ekki verið metinn

Úttekt Ríkisendurskoðunar er annars vegar sögð árangursmiðuð og beinast að því hvort stjórnsýsla loftslagsmála sé skipulögð með tilliti til árangurs, hvort markmið séu vel skilgreind og mælanleg og hvernig aðgerðaáætlun loftslagsmáli stuðli að árangri.

Hins vegar beinist úttektin að skipulagi stjórnsýslulegs kerfis sem hefur verið byggt upp í kringum málaflokkinn. Stofnunin skoðar meðal annars hvort ábyrgðarskipting sé skýr, hvort samstarf ráðuneyta sé til staðar og hvernig upplýsingum og skýrslum sé miðlað.

Fyrsta aðgerðaáætlun íslenskra stjórnvalda í loftslagsmálum var sett fram af ríkisstjórn Sjálfstæðisflokks, Vinstri grænna og Framsóknarflokks árið 2018 og hefur verið uppfærð tvisvar síðan, síðast árið 2024.

Sætt hefur gagnrýni í aðgerðaáætlunum að stjórnvöld hafi ekki látið meta hversu miklum samdrætti í losun eða bindingu kolefnis hver aðgerð eigi að skila til þess að Ísland geti mætt alþjóðlegum skuldbindingum sínum.