Hótar að mæta aldrei aftur eftir „sorg­lega gagn­rýni“

Hin hvítrússneska Sabalenka og hin pólska Iga Swiatek, sem er númer tvö í heiminum, drógu sig úr keppni tveimur dögum áður en mótið átti að hefjast þann 13. febrúar.

Salah Tahlak, mótsstjóri mótsins í Dúbaí, gagnrýndi ákvörðun þeirra og sagði að svipta ætti þær stöllur stigum á heimslistanum vegna hennar.

„Ég held að ummælin dæmi sig sjálf,“ segir Sabalenka og bætir við: „Það er í raun sorglegt að sjá mótstjóra vernda ekki okkur leikmennina. Það eina sem þeir hugsa um eru tekjurnar af mótunum sínum.“

„Ég er ekki viss um að ég vilji fara þangað nokkurn tímann aftur eftir ummæli hans. Hann fór yfir strikið,“ segir hún jafnframt.

Sabalenka fagnaði sigri á Indian Wells-mótinu í Kaliforníu um helgina en það var fyrsta mót hennar frá því að hún lenti í öðru sæti á Opna ástralska í janúar.

Aðrar tenniskonur standa með Sabalenku og Swiatek, þar á meðal Coco Gauff, sem segist hafa skilning á því að þær hafi sleppt mótinu eftir að hafa tekið þátt á því ítrekað árin á undan.

Tennisfólk hefur reglulega lýst yfir áhyggjum af þéttri dagskrá og álagi sem fylgir uppstillingu móta á heimsvísu. Það nær yfir ellefu mánuði ársins fyrir fremstu tennisspilara heims.