„Höfum ekki unnið nóg“

Trump ávarpaði þingmenn Repúblikana í Flórída fyrr í kvöld þar sem hann ræddi stöðu átakanna í Íran en tíu dagar eru síðan Ísraels- og Bandaríkjaher hófu að gera árásir á Íran. Átökin hafa síðar dreift úr sér um stóran hluta Mið-Austurlandanna með loftárásum Írana og Ísraela og Bandaríkjamanna á víxl.

Sagði árásirnar til komnar vegna hótana Írana

Á fundinum lýsti Trump aðgerðum Bandaríkjahers sem skammtímaaðgerð til að „losna við nokkra mjög illa menn“. Aðgerðin væri í raun „smávægilegur útúrdúr“ úr hans dagskrá.

Þá sagðist hann hafa fyrirskipað loftárásirnar í lok febrúar vegna þess að Íranir hefðu hótað að gera árásir á Bandaríkin innan viku. 

„Þeir áttu miklu fleiri eldflaugar en nokkurn hefði grunað,“ sagði Trump. Á undanförnum tíu dögum hefði Bandaríkjaher aftur á móti eyðilagt áttatíu prósent af eldflaugavörpum og sjóher Íran.

 „Við höfum þegar unnið á svo marga vegu, en við höfum ekki unnið nóg,“ sagði hann við þingmennina. „Við höldum ótrauð áfram, staðráðin í að ná fullnaðarsigri og að útrýma þessari langvarandi ógn í eitt skipti fyrir öll,“ sagði Trump og vísaði þar væntanlega til kjarnorkuáætlunar klerkastjórnarinnar. 

Hann minntist á efnahagslegu áhrifin sem stríðið hefur haft í för með sér. Líkt og fram hefur komið hefur verð á hráolíu ekki verið hærra í fjögur ár en frá því að stríðið hófst hefur olíuverð hækkað um í kringum fjörutíu prósent. 

Um bandaríska hlutabréfamarkaðinn, sem tók dýfu í dag, sagði hann að hann kæmist aftur á flug innan tíðar. „Um leið og við erum búin að losa okkur við allt sem við erum að vinna í núna... Við höfðum í raun ekkert val.“

Ekki sagt hvern hann vilji í stað Khamenei

Á blaðamannafundi að fundinum loknum ítrekaði Trump „velgengni“ Bandaríkjahers í Íran og sagði hernaðaraðgerðina svo gott sem yfirstaðna. Herinn hafi skotið á meira en fimm þúsund skotmörk, þar á meðal mikilvæga hernaðarinnviði. 

„Eldflaugamáttur þeirra hefur minnkað í um tíu prósent, jafnvel minna,“ sagði hann. Þá sagði hann síðar að drónamáttur ríkisins væri um 25 prósent af því sem hann hefði verið fyrir árásirnar.  Blaðamenn, þar á meðal blaðamaður BBC á staðnum, hafa dregið í efa réttmæti upplýsinga sem hann hefur gefið um eyðileggingu í Íran. 

Aðspurður sagðist hann enn og aftur reikna með að árásum Bandaríkjahers lyki innan tíðar. 

„Bráðum, hugsa ég. Allt sem Íranir eiga er fyrir bí, meira að segja forystan.“

Trump sagði í samtali við New York Post fyrr í dag að hann væri óánægður með val Írana á nýjum leiðtoga en Mojtaba Khamenei, sonur Ali Khamenei, nýfallins æðstaklerks Íran, hefur tekið við embættinu. Trump hefur ekkert gefið út um hans óskir í þeim efnum en sagst vilja hafa áhrif í vali á næsta þjóðarleiðtoga.