Belgísku stelpurnar blómstra undir stjórn Betu

Elísabet Gunnarsdóttir, eða Beta eins og hún er oftast kölluð, stýrði belgísku stelpunum til sigurs í báðum leikjunum.

Í dag vann Belgía 5-0 sigur á Ísrael á heimavelli en hafði unnið sömu þjóð 3-0 í útileik þjóðanna fyrir nokkrum dögum síðan. Sex stig af sex mögulegum og markatalan 8-0 eftir tvo fyrstu leikina í baráttunni um að komast í umspilsleiki um sæti á HM í Brasilíu 2027.

Fyrirliðinn Tessa Wullaert skoraði tvö fyrstu mörk Belga í dag á 10. og 16. mínútu og á 19. mínútu var staðan orðin 3-0 eftir mark frá Zeniu Mertens.

Wullaert innsiglaði síðan þrennu sína með marki úr vítaspyrnu á 66. mínútu. Hún skoraði einnig eitt mark í fyrri leiknum og var því með fjögur samanlagt. 

Kassandra Missipo skoraði síðan fimmta og síðasta markið í uppbótartíma leiksins. 

Þetta var fjórði sigur Belga í síðustu fimm leikjum sínum undir stjórn Elísabetar.